दमक ,२ साउन । नेपाल विद्युत प्राधिकरणका कर्मचारीको कार्यसम्पादन मूल्यांकन अब विद्युतीय माध्यमबाट गरिने भएको छ। विद्युतीय प्रणालीमार्फत कर्मचारीले फाराम भर्ने, मूल्यांकन तथा व्यवस्थापन गर्ने व्यवस्था गरिएको बताइएको छ।
साथै, अभिलेख सुरक्षित तथा गोप्य रहने गरी डिजिटल प्रणालीमार्फत राखिने प्राधिकरणले जारी गरेको विज्ञप्तिमा उल्लेख गरिएको छ।
विद्युत प्राधिकरण कर्मचारी सेवा, सर्त विनियमावली, २०७५ को विनियम ५९ को उपविनियम २९ अनुसार यस्तो व्यवस्था गरिएको बताइएको छ। ‘सम्भवतः नेपालको निजामती सेवा तथा सार्वजनिक संस्थानमा प्राधिकरणले पहिलो पटक विद्युतीय माध्यमबाट कर्मचारीको कार्यसम्पादन मूल्यांकन फाराम भर्ने, मूल्यांकन तथा व्यवस्थापन गर्ने प्रक्रिया लागू गरेको हो,’ विज्ञप्तिमा उल्लेख गरिएको छ।
प्राधिकरणले साउन १ गतेदेखि यो प्रक्रिया लागू गरेको जनाएको छ। यसबाट कर्मचारीको कार्यसम्पादन मूल्यांकन नियमित, निष्पक्ष, सरल, मितव्ययी, गोप्य, सुरक्षित र विश्वसनीय हुने प्राधिकरणको भनाई छ।
