दमक, ३ साउन । दमकको वडा नं २ स्थित डाकिनी चोक । ढुकुरपानी जाने सडक । डाकीनी नाम गरेको सानो खोल्सी । बाटो अली घुमाउरो छ । अनि यहा एउटा बक्स कल्भर्ट पनि बनाइएको छ । जसले गर्दा यो सडक अन्तर्गत यस क्षेत्रमा दुर्घटना पनि बढि हुन्छ । यो क्षेत्रमा दुर्घटना नहोस भनेर स्थानीयले बिगतमा पुजा समेत गरेका थिए । त्यसपछि यहाँ एउटा बोर्डपनि लगाइएको थियो । फोहोर मैला निषेधित क्षेत्र अर्थात यहाँ फोहोर फाल्न मनाहि छ भनेर । तर फोहोर फाल्न मनाहि लेखेको बोर्डकै अगाडि फोहोरको डङ्गु्र थुपारिएको छ । खासगरि रातको समयमा दमक बजार क्षेत्रका व्यापारीलेनै फोहोर लगेर फाल्ने आशंका स्थानीबासीको छ ।
यस क्षेत्रमा खासगरी सिसा र अस्पतालजन्य फोहोरहरु बढि मात्रामा भेटिए । नकुहिने र वातावरणलाई बढि क्षति पुर्याउने फोहोरको डङ्गुरनै यहाँ थुप्रिएको थाह पाएपछि यूवा संघ दमक नगर कमिटीले यस क्षेत्रको फोहोरलाई उठाउने निर्णय गर्यो । त्यसपछि शनिबार बिहानै त्यस क्षेत्रमा आफ्ना सदस्य, सुभचिन्तक र पार्टीका बिभिन्न नेताहरुलाई समेत लिएर युवा सघंको टोली त्यस क्षेत्रमा पुग्यो । यहाँ मान्छेले मात्रै उठाउन सक्ने गरिको फोहोर थिएन । जसले गर्दा फोहोर उठाउनैका लागी डोजर समेत लगियो । डोजरले घण्टौ सम्म फोहोर खनेर निकालेपछि र सहभागीहरुको समेत सहायतामा यो क्षेत्र केहि घण्टामै सफा र चिटिक्क देखियो । यो कार्यक्रममा नेकपा एमालेका केन्द्रिय सदस्य रोमनाथ ओली, कोशी प्रदेश सचिवालय सदस्य अम्बिका खनाल, दमक नगर कमिटी अध्यक्ष राम पौडेल लगायत स्थानीय नेताहरुको सहभागिता रहेको युवा संघ दमक नगर कमिटीका अध्यक्ष छवी खतिवडाले जानकारी दिनुभयो ।
