दमक,५ साउन । दमक नगरपालिकाको वातावरण समितिले वृक्षरोपणलाई प्राथमिकताको साथ अघि बढाएको छ । दमक नगरपालिकाको बिभिन्न स्थानमा मात्रै होईन सडकको भित्री भागमा पनि वृक्षारोपण गरिएको छ । बिशेष गरि वार्ड नं. ६ मा यसरी वृक्षारोपण गरिएको देखिन्छ । यस्तो अभियान किन गरियो ? यसबाट स्थानीयवासीलाई के फाईदा छ त ?
सडकको छेउछाउमा वृक्षारोपण गर्दा सडकनै हरियाली भएको र बटुवालाइ पनि सजिलो भएको बताँउनुहुन्छ दमक नगरपालिका वडा नम्बर ६ का स्थानीयवासी प्रेम कुँवर । सडकमा रोपिएको विरुवा यदि निजी जग्गामा परेको भए या अरु केही असर गरेको भए हटाउँन र असर नगरेको भए त्यतिकै छोडदिन राम्रो हुने उहाँको सुझाव छ ।
प्रेम कुँवरकै जस्तो विचार ब्यक्त गर्नुहुन्छ सोही वडाका अर्का स्थानीयवासी मनवीर राई । यसरी सडक छेउमा बृक्षारोपण गर्दा गर्मीको समयमा बटुवालाई सित्तल हुने उहाको भनाइ छ । यसले बटुवालाई सित्तल बनाउने मात्र नभई सो क्षेत्रको शौन्दर्य समेत बढ्ने उहाँको बुझाइ छ ।
दमक नगरपालिकाको वातावरण समितिको तर्फबाट बढ्दो जलवायु परिवर्तनलाई ख्याल गर्दै नगरपालिकाभरी सबै वडासँग समन्वय गरेर वातावरण समितिबाट वृक्षारोेपण भइरहेको बताउनुहुन्छ दमक नगरपालिकाको वातावरण समितिका संयोजक तथा वडा नम्बर ६ का वडाध्यक्ष टेकबहादुर थापा । वडा नम्बर ६ सहित नगर भरि ५० फुटे सडकको किनारामा विरुवा रोप्ने अभियान अहिलेसम्म ५० प्रतिशत मात्र भएको र साउन १५ भित्र सबै विरुवा रोपी सक्ने लक्ष्य राखेको उहाँको भनाइ छ । वातावरण समितिको तर्फबाट ४ लाख बजेट छुट्याएको र त्यहि बजेटले विरुवा खरिद गरेको उहाले जानकारी दिनुभयो ।
सुन्दर दमक हरित नगर बनाँउने उदेश्यका साथ दमक नगरपालिकाको सबै वडाहरु वृक्षरोपण अभियानमा जुटेका छन् । बृक्षारोपण गर्नाले वातावरण मात्र होइन व्यक्तिको स्वास्थ्यमा समेत सकारात्मक प्रभाव पार्ने भएकाले यो अभियान दमक नगरभर अघि बढेको जनाइएको छ ।
