दमक, १४ कार्तिक | बङ्गालको उपसागरमा विकसित भएको शक्तिशाली उष्णकटिबंधीय चक्रवात “मोन्था” अहिले सक्रिय अवस्थामा छ । भारत र म्यानमारको तटीय क्षेत्रमा यसको प्रत्यक्ष प्रभाव देखिन थालेको छ भने, नेपालका पूर्वी र मध्य भेगमा पनि यसका अप्रत्यक्ष असर पर्ने सम्भावना मौसमविद्हरूले बताएका छन् ।
मौसम पूर्वानुमान महाशाखाका अनुसार “मोनथा” बङ्गालको उपसागरबाट उत्तर–पूर्व दिशातर्फ सर्दैछ । यसले ठूलो मात्रामा तातो र आद्र्र वायुमण्डलीय हावा नेपालतर्फ ल्याउने भएकाले पूर्वी पहाडी र तराई क्षेत्रमा हल्का देखि मध्यम वर्षा र केही स्थानमा मेघगर्जनसहितको वर्षाको सम्भावना रहेको छ ।
चक्रवातको केन्द्र बङ्गालको तट नजिक रहँदा त्यहाँको समुद्रमा हावाको वेग प्रतिघण्टा १५० किलोमिटरभन्दा माथि पुगेको छ । भारत, बंगलादेश र म्यानमारका तटीय क्षेत्रमा अहिले उच्च सतर्कता जारी गरिएको छ । समुद्र किनारका बासिन्दालाई सुरक्षित ठाउँमा सारिँदैछ ।
नेपालका पूर्वी जिल्लाहरू झापा, मोरङ, सुनसरी, इलाम, ताप्लेजुङ, र धनकुटामा आगामी दुई दिन वर्षा र चट्याङको जोखिम बढ्ने भएकाले सतर्कता अपनाउन भनिएको छ । स्थानीय प्रशासन र विपद् व्यवस्थापन समितिहरूलाई पनि तयारी अवस्थामा रहन आग्रह गरिएको छ ।
मौसमविद्हरूका अनुसार “मोनथा” अत्यन्त तीव्र शक्ति भएको चक्रवात हो, जसको उत्पत्ति बङ्गालको गर्म समुद्री सतहमा भएको हो । यस्तो चक्रवातले हावाको तीव्र बहाव, मुसलधारे वर्षा र समुद्री तटीय क्षेत्रमा ठूलो क्षति पु¥याउने गर्दछ ।
नेपालमा यसले ठूलो क्षति पु¥याउने सम्भावना नभए पनि, मौसममा उल्लेख्य परिवर्तन ल्याउने देखिएको छ । कृषकलाई विशेष सावधानी अपनाउन, नदी र खोला आसपासका क्षेत्रमा सतर्क रहन, र आवश्यक परे स्थानीय निकायको सूचनालाई पालना गर्न विज्ञहरूले आग्रह गरेका छन् ।
