काठमाडौँ,१७ कार्तिक । आगामी फागुन २१ गते निर्धारित प्रतिनिधिसभा निर्वाचन अगाडि नियमित महाधिवेशन हुने निश्चित भएमा नेपाली कांग्रेसका विशेष महाधिवेशन माग गर्दै हस्ताक्षर गरेकाहरूले स्विकार्ने भएका छन् ।
महाधिवेशन प्रतिनिधिले हस्ताक्षर गरी गत असोज २९ गते कार्यवाहक सभापति पूर्णबहादुर खड्कालाई बुझाउनु भएको थियो । खड्काले हस्ताक्षर सहितको पत्र आएको जानकारी केन्द्रीय कार्यसमिति बैठकलाई गराइसकनु भएको छ ।
हस्ताक्षर सङ्कलनको नेतृत्व गर्ने मध्यमा कांग्रेस युवा नेता मनोजमणि आचार्यले समयको पदचापलाई मनन गर्दै घोषित निर्वाचन अगाडि नियमित महाधिवेशन हुने भएमा आफूहरू सकारात्मक बन्ने जानकारी दिनु भयो । ‘हाम्रो माग मङ्सिरभित्र नियमित महाधिवेशन होस् भन्ने हो । तर, अहिलेको समयको पदचापलाई ख्याल गरी घोषित निर्वाचन अघि नियमित महाधिवेशन हुने निश्चित भयो भने सकारात्मक बन्छौँ,’ आचार्यले भन्न्ु भयो,‘हाम्रो चाहना महाधिवेशन होस् भन्ने हो । महाधिवेशन हुने निश्चित भएमा सकारात्मक हुनुपर्छ ।’
कांग्रेस केन्द्रीय सदस्य प्रदीप पौडेलले निर्वाचन अगाडि नियमित महाधिवेशन हुने निश्चित भएमा आफूहरूले विशेष महाधिवेशन पक्षधरलाई मनाउने बताउनु भयो । ‘निर्वाचन अगाडि नियमित महाधिवेशन निश्चित भएमा विशेष महाधिवेशन पक्षधरलाई मनाउन सकिन्छ,’ केन्द्रीय सदस्य पौडेलले र भन्न्ुा भयो,‘नेतृत्वले महाधिवेशन हुने निश्चिन्तता प्रदान गरोस् हामी उनीहरूलाई मनाउँछौँ ।’
कांग्रेसमा संस्थापन पक्षले आगामी वैशाखमा नियमित गर्ने बताइरहेका छन् । इतर समूहले मङ्सिरभित्र नियमित महाधिवेशन गर्नुपर्ने बताइरहेको छ । यही विषयमा कुरा नमिल्दा जारी केन्द्रीय समिति प्रभावित बन्दै आएको हो । शुक्रबार र आइतबारका लागि बोलाइएको केन्द्रीय समिति सूचना टाँस गरेर स्थगित गरिएको छ । मंगलबार दिउँसो एक बजेका लागि केन्द्रीय कार्यसमिति बैठक आह्वान गरिएको थियो ।
