पथरी शनिश्चरे, कार्तिक २० / मोरङको पथरी शनिश्चरे नगरपालिका कार्यालयले नगरमा जारी इन्ट्रा पथरी शनिश्चरे गोल्डकपको लागि आवश्यक पहिलो र दोस्रो नगद पुरस्कार राशि व्यवस्थापन गर्ने भएको छ ।
नगर प्रमुख मोहनप्रसाद तुम्वापोको अध्यक्षतामा कार्यपालिको पछिल्लो बैठकले प्रतियोगिताको पहिलो र दोस्रो पुरस्कारको नगद राशि ७ लाख ५० हजार रुपैयाँ सहयोग प्रदान गर्ने निर्णय गरेको हो ।
बैठकले नगरमा ग्राभेलको दररेट १ हजार १ सय ८० प्रतिघनमा निर्धारण गर्ने, मालपोत कार्यालय र स्थानीय जग्गा दररेट फरक परेर नागरिकले पाएको सास्तीलाई हल गर्न दररेट समायोजन गरिने, पथरी नगर अस्पतालको नयाँ भवनबाट सेवाप्रवाह गर्न निर्माण सम्पन्न भएको भवन ठेकेदार कम्पनीलाई फरफराकका लागि पत्राचार गरिने लगायतका निर्णय गरेको छ ।
यस्तै, निर्वाचन आयोगबाट प्राप्त पत्रमा नगरपालिकाको मतदान स्थलहरू साविककै स्थानलाई कायम गरिने, जेनजी आन्दोलनको समयमा जोखिम मोलेर नगरपालिकाको एम्बुलेन्स, दमकल, शब वाहन, फोहोर उठाउने गाडी लगायतका यातायातका साधनलाई जोगाउने चालक र नगर प्रहरीहरुलाई सम्मान गरिने, पाक्न लागेको धानबालीमा भएको क्षतिको विवरण संकलन गरी प्रदेश सरकार र संघीय सरकार समक्ष क्षतिपूर्ति माग गर्ने पनि निर्णय भएको छ ।
जेनजी आन्दोलनका क्रममा नगरपालिका र वडा कार्यालयमा भएको क्षतिको विवरण राष्ट्रिय योजना आयोगमा पठाउने, नगरपालिकाको कार्यालय र वडा कार्यालयहरुलाई तत्कालका लागि आवश्यक कम्प्युटर र प्रिन्टर खरिद गर्ने समेत निर्णय बैठकको छ । संघीय सरकारले बजेटको विस्तृत जानकारी पठाएपछि नगरपालिकाको विशेष नगरसभा गरिने र पथरी बजार र भित्रका बाटोहरुलाई यातायात सहज बनाउन एकतर्फी सञ्चालनको योजना बनाउने सल्लाह गरिने लगायतको निर्णयहरु गरिएको नगर प्रवक्ता एवम् वडा नम्बर ८ का अध्यक्ष नविन कार्कीले जानकारी दिनुभयो ।
