पथरी, २० कार्तिक / सानैदेखि तिक्ष्ण स्वभावका उहाँ कविता, वक्तृत्वकला, वादविवाद, हाजिरीजवाफ जस्ता सृजनशील कर्ममा सधैं अगाडि हुनुहुन्थ्यो । यस्तै यस्तै कर्ममा जोडिएर लेख्न र पढ्न रुचाउने मोरङको पथरी शनिश्चरे ७ का रोहिणीप्रसाद घिमिरे संयोगवस पत्रकारिता क्षेत्रसँग जोडिन पुग्नुभयो ।
त्यो बेला पत्रकारिता गर्नु भनेको फलामको च्युरा चपाउनु जस्तै थियो । ०५३ सालमा इटहरीबाट राजकुमार दिक्पाल, इन्द्र न्यौपानेहरुले प्रकाशन गरेको ‘नवसंचार’ साप्ताहिकमा समाचार लेख्न थाल्नु भएका उहाँले लामो समय त पत्रकारिता गर्नु भएन । तर उहाँको विश्लेषणात्मक लेखन कलाले उत्कृष्ठ पत्रकारका रुपमा छाप भनें छोड्न सफल भयो ।
‘नवसंचार’पछि धरानको ‘न्यूज टाइम्स’मा काम गर्दा सम्पादन मण्डलमा रहनु भएका राजकुमार दिक्पालले सृजनशील नाम जुराईदिनुभयो ‘रोहित पराई’ । त्यसपछि धरानकै ‘मर्निङ पोष्ट’ दैनिकमा पनि संवाददाता भएर काम गर्नुभयो । त्यसबीचमा काठमाडौंको ‘जनभावना’ साप्ताहिकमा केही समय समाचार पठाउन भ्याउनु भयो । काठमाडौंको ‘नेपाल समाचारपत्र’ दैनिकमा लेख तथा फिचर छापिए । ०५४ सालबाट शिक्षण पेशामा लागेपछि चाँहि उहाँले पत्रकारिता कम गर्दै जान थाल्नु भयो । २०५५ बाट प्रकाशित पथरीको ‘मोफसल’ साप्ताहिकमा सम्पादकको भूमिकामा रहेपनि उहाँको सक्रिय पत्रकारिता लगभग १० वर्षसम्म मात्र रह्यो । ०६४ बाट प्रकाशित ‘अनमोलमणि’ साप्ताहिकमा सम्पादकको नाम उहाँकै रहेपनि सम्पादनको भूमिकामा भनें रहनु भएको छैन ।
रुद्रप्रसाद र उमा घिमिरेका जेठो सन्तानका रुपमा वि.सं.२०३० साल असोज २१ गते संखुवासभाको पाँचखपनमा जन्मिनु भएका उहाँ ०६९ सालबाट पथरी शनिश्चरे ७ को बालकल्याण माविको प्रधानाध्यापकको जिम्मेबारीमा हुनुहुन्छ । पथरी शनिश्चरे नगरको स्थानीय पाठ्यक्रम र पाठ्यपुस्तक निर्माणका एक सदस्य समेत रहनु भएको छ ।
कविताहुँदै गजल र मुक्तक विधामा प्रभावकारी सर्जकका रुपमा चिनिनु हुने पराई पछिल्लो समय छन्द कविता र बहरका गजल लेखनमा बढी सक्रिय हुनुहुन्छ ।
उहाँ सृजना चौतारी पथरी शनिश्चरे, इटहरी साहित्यिक समूह, छन्द अलंकार काठमाडौं, नझरेका फूलहरु सुन्दरहरैंचा लगायत दर्जनौं संघ संस्थाबाट सम्मानित र पुरस्कृत भइसक्नु भएको छ । उहाँसँग उज्यालो खबरको ‘अनुशीलन’ कार्यक्रममा गरिएको भलाकुसारीको भिडिओ हेर्नुहोला :
