झापा,२५ कार्तिक। झापाको कन्काई नगरपालिकामा दुईवटा मोटरसाइकल एकआपसमा ठोक्किँदा एक जनाको मृत्यु भएको प्रहरीले जनाएको छ ।
गएराति करिब ९ः१० बजे कन्काई–३ नयाँ बस्तीस्थित भित्री सडकखण्डमा सुरुङ्गा पुलबाट टप्पुचोकतर्फ जाँदै गरेको प्रदेश–१–०२–०५८प–५०६३ नम्बरको मोटरसाइकल र विपरीत दिशाबाट आउँदै गरेको प्रदेश–१–०१–०१५प–४२१० नम्बरको मोटरसाइकल एकआपसमा जुधेका हुन्।
दुर्घटनामा ५०६३ नम्बरको मोटरसाइकल चालक कन्काई–३ का ३३ वर्षीय दिपक सिटौला गम्भीर घाइते भएका थिए भने टाउकोमा चोट लागेका सिटौलालाई उपचारका लागि बिर्तामोडस्थित बी एण्ड सी अस्पताल पठाइएकोमा उनको बाटैमा मृत्यु भएको थियो।
घटनापछि इलाका प्रहरी कार्यालय सुरुङ्गाबाट प्रहरी नायव निरीक्षक सुबास ढुंगानाको कमाण्डमा टोली खटिएको थियो । प्रहरीले दुर्घटनामा संलग्न ४२१० नम्बरको मोटरसाइकल र त्यसका चालक कन्काई–६ का २३ वर्षीय नितेश बस्नेत तथा पछाडि सवार बाह्रदशी–७ सुन्दरटोलका २१ वर्षीय उत्सव बस्नेतलाई नियन्त्रणमा लिएको बताएको छ ।
