काठमाडौँ,२ मंसिर । युएईले रोकेको भिजिट तथा श्रम भिसालगायतको विषयमा त्यहाँका नेपाली राजदूत तेजबहादुर क्षेत्रीले आज मङगलबार युएईको परराष्ट्र मन्त्रालयमा कन्सुलर मामिला हेर्ने कार्यवाहक सहसचिव राशिद मदहरसँग भेटवार्ता गर्नु भएको छ।
युएईस्थित परराष्ट्र मन्त्रालयमै मंगलबार भएको भेटमा दुवै देशबिच श्रम सहकार्य, कन्सुलर सेवामा देखिएका चुनौती, कामदारले भोग्नुपर्ने झन्झट, कागजी प्रक्रिया र सेवा प्रवाहलाई अझ सुव्यवस्थित बनाउने विषयमा विस्तृत छलफल भएको नेपाली दूतावासले बताएको छ ।
साथै हाल युएईमा रोजगारी तथा भ्रमणका लागि आउने नेपालीका लागि भिसा प्रक्रिया अझ सहज र छरितो बनाउन सकिने उपायबारे पनि सकारात्मक कुराकानी भएको दूतावासले बताएको छ । सो भेटमा युएई परराष्ट्र मन्त्रालयका विदेशी नागरिक शाखाका निर्देशक डा. माजिद अल मान्सुरी तथा नेपाली दूतावासकी काउन्सेलर तथा उपनियोग प्रमुख रन्जिता दाहाल पनि उपस्थित हुनुन्थ्यो ।
नेपाली दूतावासले भेटवार्ताले दुवै मुलुकबिचको आपसी समन्वय बलियो बनाउने र युएईमा रहेका नेपाली कामदार तथा नागरिकका हित संरक्षणमा सहयोग पुग्ने विश्वास राखेको छ।
