पथरी, ७ पुस / श्री शान्ति किर्तन मण्डली पथरी शनिश्चरेले कार्तिक १६ देखि २२ गतेसम्म सञ्चालन गरेको ब्रम्ह महापुराण महायज्ञबाट संस्थाले साढे ६ लाख रुपैयाँ बढीको दान संकलन भएको छ ।
संस्थाको दोस्रो पुराणका रुपमा सञ्चालित सो महायज्ञमा दान वापत ६ लाख ५१ हजार ४ सय २४ रुपैयाँ आम्दानी भएको छ । जसमा २ लाख ८६ हजार ४ सय ६० खर्च भएर ३ लाख ६४ हजार ९ सय ६४ रुपैयाँ बचत भएको संस्थाका कोषाध्यक्ष तोयानाथ ढकालले जनाउनु भयो । उहाँले सो रकमबाट संस्थाको भवन निर्माणमा रहेको ऋण समेत तिरिसकिएको उल्लेख गर्नुभयो ।
।
संस्थाको अठारौं महापुराणको योजना अनुरुप दोस्रो पुराणका रुपमा सञ्चालित सो महायज्ञमा स्थानीय आचार्य पण्डित केवलकृष्ण अधिकारी र दीपक भट्टराईमार्फत पाठ पारायण र संगीतमय कथा वाचन गर्नुभएको थियो ।
उत्तरपूर्वी मोरङको पथरी शनिश्चरे १ मा शान्ति सद्भावसहितको आध्यात्मिक गतिविधिमा सक्रिय सो मण्डली २०६० सालमा स्थापना भएको हो । किर्तन गरेको रकम, किर्तन मण्डलीका सदस्यहरुबाट संकलित सहयोग र सदस्य बाहिरबाटको केही सहयोगबाट ०७१ सालमा साढे १८ लाखमा साढे ९ धुर जग्गा किनेर भवन निर्माणको योजना अघि बढ्यो । त्यसपछि उसैगरी सहयोग जुटाउँदै क्रमिक रुपले बनाउँदै लगेको भवन हाल ३ तले भएको छ । हालसम्म त्यसमा लागेको खर्च हिसाव गर्दा १ करोड हाराहारी रहेको उल्लेख छ । जुन काम किर्तन मण्डलीले गरेको नेपालकै नमुना काममा पर्दछ ।
संस्थाको आध्यात्मिकताको प्रवद्र्धनका खातिर गरिएका कार्यक्रममा जोडिनेहरु बढिरहेका छन् । हालसम्म सदस्यको संख्या १ हजार २ सय पुगेको छ ।
