विराटनगर,८ पुस । नेकपा एमालेका नवनिर्वाचित सचिव एवं कोशी प्रदेश इन्चार्ज शेरधन राईले पार्टीको नीति र निर्णय विपरीतका गतिविधि गर्ने जोसुकैलाई पनि कारबाही गरिने चेतावनी दिनु भएको छ।
विराटनगरमा आयोजित पत्रकार सम्मेलनमा बोल्दै इन्चार्ज राईले नेकपा एमाले संस्थागत निर्णय र पद्धतिमा चल्ने पार्टी भएकाले पार्टीभित्रै रहेर पार्टीकै हितविपरीत काम गर्ने वा संस्थागत निर्णयलाई चुनौती दिने छुट कसैलाई नभएको स्पष्ट पार्नु भएको छ । उहाँले पार्टीको नीति, उद्देश्य र अभियानमा बिना सर्त सहभागी हुनुपर्ने उल्लेख गर्दै यदि कसैले फरक ढंगले प्रस्तुत हुने वा पार्टीको विधिको अवज्ञा गर्न खोजेमा विधान बमोजिम कारबाहीको प्रक्रिया अगाडि बढाइने बताउनु भयो ।
११ औँ राष्ट्रिय महाधिवेशनले नेकपा एमालेलाई थप एकताबद्ध बनाएको दाबी गर्दै नेता राईले एमाले विभाजित हुने विपक्षीहरूको सपना चकनाचुर भएको बताउनु भयो । उहाँले महाधिवेशनले नयाँ म्यान्डेट र उत्साह प्रदान गरेको र पार्टी अब सशक्त ढंगले जनताको बीचमा जाने उल्लेख गर्नु भएको छ ।
पार्टीमा कुनै पनि प्यानल वा गुटको अस्तित्व नरहेको र निर्वाचनमा सहभागी सबै सदस्यहरू पार्टीकै विधि र प्रक्रियामा बाँधिनुपर्नेमा उहाँले जोड दिनु भयो । एमाले १५ दिनभित्र निर्वाचन भए पनि सामना गर्न सक्ने गरी तयारी अवस्थामा रहेको भन्दै उहाँले वर्तमान सरकारले चुनावलाई आफ्नो अनुकूलतामा प्रयोग गर्न खोजेको आरोप समेत लगाउनु भएको छ ।
यसैगरी, राईले लोकतन्त्र र संविधानको रक्षाका लागि कोशी प्रदेशका १४ वटै जिल्ला र प्रमुख सहरहरूमा विभिन्न स्वरूपका आन्दोलनहरू सुरु गर्ने घोषणा गर्नु भयो । विगतमा भएका अराजक गतिविधि र हिंसा रोक्न एमालेले नागरिक सुरक्षाको जिम्मेवारी बहन गर्दै आन्दोलनमा उत्रने उहाँको भनाइ थियो। प्रदेश सरकारको सन्दर्भमा मन्त्रिमण्डल पुनर्गठनको बेला भइसकेको उल्लेख गर्दै उहाँले यसबारे मुख्यमन्त्री र अन्य सरोकारवाला दलहरूसँग परामर्श गरी उपयुक्त समयमा निर्णय लिइने जानकारी दिनु भयो। नेकपा एमाले अहिलेको परिस्थितिमा एक ढिक्का रहेको र आगामी निर्वाचनमा प्रमुख शक्तिको रूपमा स्थापित हुने उहाँले विश्वास व्यक्त गर्नु भयो ।
