बुटवल,१६ पुस । नेकपा एमालेका नेता एवम रूपन्देही–५ बाट प्रतिनिधिसभाका निवर्तमान सांसद बासुदेव घिमिरेले एमाले छोडेको घोषणा गर्नु भएको छ। मंगलबार राति सामाजिक सञ्जालमा पोष्ट गर्दै घिमिरेले आबद्ध पार्टीको जिम्मेवारीमा नरहेको घोषणा गर्नु भएको छ । तिलोत्तमा नगरपालिकाका पूर्व नगरप्रमुखसमेत रहेका उहाँ एमालेको ११औं महाधिवेशनमा केन्द्रीय सदस्यमा पराजित हुनु भएको थियो ।
उहाँले सामाजिक सञ्जालमा स्टाटस लेख्दै पुराना राजनीतिक दलहरुको मुख्य नेतृत्वले मुलुकको आम जनताको ईच्छा र चाहनालाई सम्बोधन गर्ने अवस्था नदेखिएको भन्दै आजको दिन देखि आफू संलग्न रहेको पार्टीको जिम्मेवारीदेखि अलग रहेको घोषणा गर्नु भएको छ ।
‘अहिले आम जनताको चाहना सुशासन, विकास, समृद्धिका साथै नेतृत्व हस्तान्तरण, पुस्तान्तरण र रुपान्तरण पनि रहेको छ,’ उहाँले लेख्नु भएको छ, ‘देशको आवश्यकता,इतिहासको गति, आम नागरिकको अपेक्षालाई सम्बोधन गर्नु अहिलेको मुख्य कार्यभार हो । देशप्रतिको अविचलित निष्ठा, सुशासन, विकास र समृद्धि राजनीतिको अनिवार्य शर्त हो । पुराना दलहरूको मुख्य नेतृत्वले मुलुकको आम जनताको ईच्छा र चाहनालाई सम्बोधन गर्ने अवस्था नदेखिएकोले आजको दिनदेखि म संलग्न रहेको पार्टीको जिम्मेवारीदेखि अलग रहेको छु ।’
उहाँले राष्ट्रिय स्वतन्त्र पार्टीबाट पार्टीमा समाहित हुन प्रस्ताव आएको, प्रस्तावमा सकारात्मक रहे पनि निर्णयमा नपुगेको बताउनु भयो । उहाँले सुशासन, विकास, रोजगारीका साथ मुलुकलाई समृद्धिको यात्रामा अघि बढाउने अभियानमा ईमान र निष्ठाका साथ सदैव आफू सबैसँग सँगसँगै रहने प्रतिबद्धता पनि जनाँउनु भएको छ् ।
रास्वपा स्रोतका अनुसार उनी रूपन्देही–२ बाट चुनाव लड्ने गरी छलफलमै छन् । रूपन्देही–२ बाट एमाले उपाध्यक्ष विष्णु पौडेल चुनाव लड्दै आएका छन् ।
