दमक,२५ माघ । गौरीगञ्ज–पाडाजुगी जोड्ने सडक कालोपत्रे भएपछि यहाँका स्थानीयले ठूलो राहत महसुस गरेका छन्। यसअघि सडक ग्राभेल अवस्थामा हुँदा सवारी चल्दा अत्यधिक धुलो उड्ने, वर्षायाममा हिलाम्मे हुने र समयमा गन्तव्यमा पुग्न मुस्किल पर्ने समस्या थियो। दैनिक आवतजावत गर्ने बासिन्दा, विद्यार्थी र यात्रुहरू सबैभन्दा बढी प्रभावित थिए। धुलोका कारण स्वास्थ्यमा असर पर्ने र यातायात सेवा अनियमित हुने गुनासो व्यापक थियो। तर अहिले अवस्था फरक छ। सडक फराकिलो बनाउँदै कालोपत्रे गरेपछि यात्रा सहज, सुरक्षित र छिटो भएको स्थानीयले बताएका छन्। विद्यालय जाने विद्यार्थीदेखि व्यापार व्यवसाय गर्नेहरू सबैले प्रत्यक्ष फाइदा पाएका छन्।
स्थानीय राम चन्द्र गुरागाँई खुशी हुँदै भन्नु हुन्छ, “पहिले पाडाजुगी हँदै गौरीगञ्ज जाने सडक ग्राभेल हुँदा धेरै धुलो उड्थ्यो। अहिले कालो पत्रे र फराकिलो सडक भएकाले यातायात गर्न धेरै सहज भएको छ। घर अगाडि जेबराक्रसिङ छ, छोटो समयमा धेरै ठाउँमा पुग्न सकिन्छ।”
पदमा देबी दाहालका अनुसार पनि पहिले सडक सानो र जोखिमपूर्ण थियो। “धेरै दुर्घटना हुन्थ्यो, तर अहिले फराकिलो कालोपत्रे भएको कारण समयमा गन्तव्यमा पुग्न सजिलो भएको छ। समयको पनि बचत भएको छ।”
यसरी ग्राभेलको सास्ती हट्दै फराकिलो कालोपत्रे सडक बनेपछि स्थानीयको दैनिकी सहज भएको छ। अब फागुन २१ गते हुने निर्वाचन मार्फत चुनिने जनप्रतिनिधिले यस्तै विकासलाई निरन्तरता दिँदै बाँकी पूर्वाधार पनि व्यवस्थित बनाउने र स्थानीय जनजीवन अझ सरल बनाउने अपेक्षा यहाँका बासिन्दाले गरेका छन्।
