दमक,२५ माघ । पाडाजुगी चोकदेखि गुवाबारी हुँदै बाह्रघरे स्कुलचौन जोड्ने सडक अहिले यस क्षेत्रको विकास र परिवर्तनको उदाहरण बनेको छ। केही समय अघिसम्म ग्राभेल अवस्थामा रहेको यो सडक बर्खामा हिलो र हिउँदमा धुलोका कारण स्थानीय बासिन्दा, विद्यार्थी र बिरामीका लागि ठूलो समस्या थियो। सवारी आवागमन कठिन हुँदा दैनिक यात्रा जोखिमपूर्ण बन्दै आएको थियो। तर अहिले अवस्था फेरिएको छ। सडक कालोपत्रे बनेसँगै आवागमन सहज, सुरक्षित र व्यवस्थित भएको छ। वर्षायाममा हिलोको समस्या हटेको छ भने धुलोमुक्त सडकले स्वास्थ्य र समय दुवै बचत भएको स्थानीयको भनाइ छ। सडक सुधारपछि विद्यालय जाने विद्यार्थी, अस्पताल पुग्ने बिरामी र स्थानीय व्यवसायमा समेत सकारात्मक प्रभाव देखिन थालेको छ।
स्थानीय विश्वनाथ नेपाल विगतका दिन सम्झिँदै भन्नु हुन्छ, पहिले बर्खामा हिलो र हिउँदमा धुलोले बस्नै सकिँदैनथ्यो। अहिले सडक पिच भएपछि धेरै सहज भएको छ। बिरामी हुँदा समयमा अस्पताल पुग्न सकिने अवस्था बनेको उहाँ बताउनु हुन्छ।
नवराज तिवारीका अनुसार पनि अहिले पहिलेभन्दा धेरै राहत मिलेको छ। सडक सहज भए पनि दुवै तर्फ नाला नहुँदा बर्खामा समस्या देखिने गरेको उहाँको गुनासो छ। सडक बनेपछि स्थानीय मात्र होइन, बाहिरबाट आउने यात्रु पनि सहज रूपमा गन्तव्यमा पुग्न सक्ने अवस्था बनेको छ।
बाइट… नवराज तिवारी, लखनपुर–६
चन्द्रबहादुर प्रधान भन्नु हुन्छ, पहिले सडक कच्ची हुँदा साइकल कुदाउन समेत मुस्किल थियो। अहिले कालोपत्रे भएपछि गाडी, मोटरसाइक ललगायत सबै सवारी साधन सहज रूपमा चल्न थालेका छन्। यही सडक प्रयोग गरेर छोटो समयमा विभिन्न स्थानमा पुग्न सकिने उहाँको भनाइ छ।
यसरी ग्राभेलको सास्ती हट्दै सडक पक्की बनेपछि स्थानीयको दैनिकी सहज बनेको छ। अब आगामी फागुन २१ गते हुने निर्वाचन नजिकिँदै गर्दा यहाँका बासिन्दा विकासलाई निरन्तरता दिने, अधुरा पूर्वाधार पूरा गर्ने र जनजीवन अझ सहज बनाउने जनप्रतिनिधिको अपेक्षा गरिरहेका छन्।
