दमक,२५ माघ ।दमक नगरपालिका कृषियोग्य भूमि भएको क्षेत्र हो। यहाँका अधिकांश किसानको जीविकोपार्जन खेतीमै निर्भर छ। तर वर्षौँदेखि सिँचाइको अभावका कारण किसानले ठूलो सास्ती भोग्दै आएका थिए। यही समस्यालाई समाधान गर्न संघीय सरकारसँगको सहकार्यमा दमकमा चारवटा डिप बोरिङ निर्माण गरिएको हो। निर्माण भएका डिप बोरिङमध्ये एउटा पूर्ण रूपमा सञ्चालनमा आएको छ। यसले आसपासका खेतमा नियमित सिँचाइ सुविधा उपलब्ध गराउँदै किसानलाई प्रत्यक्ष राहत दिएको छ। अर्को डिप बोरिङ सञ्चालनको तयारीमा रहेको छ भने बाँकी दुईवटा डिप बोरिङ अझै निर्माणाधीन अवस्थामा छन्। सिँचाइ सुविधा पुगेपछि किसानले समयमै बाली लगाउन पाएका छन्। उत्पादन बढेको छ, लागत घटेको छ र खेतीप्रतिको भरोसा फर्किएको छ। पहिले वर्षाको भरमा खेती गर्नुपर्ने बाध्यता अहिले क्रमशः हट्दै गएको किसानहरूको भनाइ छ। तर सिँचाइ नपुगेका क्षेत्रमा समस्या अझै उस्तै छ। खेत बाँझिने, बाली सुक्ने र आम्दानी घट्ने पीडा किसानले भोगिरहेका छन्।
इन्द्रेनी डिप बोरिङ उपभोक्ता समितिका अध्यक्ष मेदनी प्रसाद खरेलका अनुसार संघीय सरकारको योजनाअन्तर्गत डिप बोरिङ निर्माण लगभग सम्पन्न भइसकेको छ। पाइपलाइनमा देखिएको प्राविधिक समस्याका कारण हाल पानी सञ्चालन रोकिएको भए पनि छिट्टै समाधान भएर सिँचाइ सुरु हुने उहाँको विश्वास छ।
यस्तै, दमक–१० का पूर्व वडाध्यक्ष बोधराज न्यौपानेले दमकमा कृषियोग्य क्षेत्र धेरै भए पनि सिँचाइको अभावले उत्पादन प्रभावित हुँदै आएको बताउनु भयो। उहाँका अनुसार एउटा डिप बोरिङ नलबारी क्षेत्रमा सञ्चालनमा छ, अर्को सञ्चालनको प्रक्रियामा छ र बाँकी दुईवटा छिट्टै सम्पन्न हुने चरणमा छन्। यी सबै आयोजना सञ्चालनमा आएपछि किसानले ठूलो राहत पाउने उहाँको भनाइ छ।
जहाँ सिँचाइ पुगेको छ, त्यहाँ किसानको मेहनतले परिणाम दिन थालेको छ। तर सिँचाइ नपुगेका खेतमा आज पनि किसानले आकाशतिर हेरेर खेती गर्नुपर्ने बाध्यता छ। संघीय सरकारसँगको सहकार्यमा सुरु गरिएका डिप बोरिङ आयोजनाले दमकमा आशा जगाएका छन्। अब आवश्यकता छ, बाँकी आयोजनालाई समयमै सम्पन्न गरी सबै किसानको खेतसम्म पानी पु¥याउने स्पष्ट र प्रभावकारी योजनाको। फागुन २१ मा जितेर आउने जनप्रतिनिधिबाट दमकका किसानको अपेक्षा पनि यही हो—घोषणा होइन, काम; आश्वासन होइन, खेतमा सिँचाइ पुग्ने विकास र किसानको जीवनमा देखिने वास्तविक परिवर्तन।
