दमक, २६ फागुन । नेपाली कांग्रेसका केन्द्रीय सदस्य सुधिर कुमार सिवाकोटीले पार्टी अब आत्मसमीक्षा गर्दै सुधारका साथ अघि बढ्ने बताउनुभएको छ।
मंगलबार रेडियो किङ एफएमको कार्यक्रम सत्य संवादमा बोल्दै उहाँले विगतमा कांग्रेसले जनताका मुद्दालाई पर्याप्त प्राथमिकता दिन नसकेको र जनतासँग प्रत्यक्ष संवाद कमजोर भएको स्वीकार गर्नुभयो। यही कारणले पछिल्लो निर्वाचनमा पार्टीले अपेक्षाभन्दा फरक परिणाम व्यहोर्नु परेको उहाँको भनाइ थियो।
सिवाकोटीले अब कांग्रेसले संगठनदेखि नेतृत्व तहसम्म व्यापक सुधार गर्दै अघि बढ्ने स्पष्ट पार्नुभयो।
पार्टीको नेतृत्व परिवर्तन हुनुपर्छ भन्ने विषयमा उठेको प्रश्नको जवाफ दिँदै उहाँले तत्काल नेतृत्व फेर्ने पक्षमा आफू नभएको बताउनुभयो। “पार्टीको नेतृत्व भर्खरै विशेष महाधिवेशनबाट चयन भएको हो। त्यसलाई फेरिहाल्नुपर्ने अवस्थामा म छैन,” उहाँले भन्नुभयो, “तर कांग्रेसका केही व्यवहार, कार्यशैली र नीतिमा सुधार गर्दै अघि बढ्नुपर्छ।”
उहाँले पछिल्लो चुनावी परिणाम आउनुमा नागरिकहरूले कांग्रेसमाथि पूर्ण विश्वास गर्न नसकेको पक्ष पनि रहेको स्वीकार गर्नुभयो। तर जनताले कांग्रेसलाई पूर्ण रूपमा अस्वीकार नगरेको उहाँको दाबी छ।
“जनताले हामीलाई ‘तिमीहरू चाहिँदैन’ भनेका होइनन्,” उहाँले भन्नुभयो, “बरु ‘तिमीहरू सुध्र’ भनेर दिएको जनादेश हो। त्यसैले हामी सुधारसहित फेरि जनताको सेवामा समर्पित हुने छौँ।”
