मोरङ/ विराटनगर भन्सार कार्यालयबाट सुपारी आयात सुरु भएको छ । गतवर्ष तोकिएको कोटाको सुपारी समयमा आयात हुन सकेको थिएन । तर, यो वर्ष भने अदालतको आदेशपछि कोटाको सुपारी आयात सुरु भएको हो । गत वर्षको चैत महिनामा वाणिज्य विभागले २५ हजार मेट्रिक टनको कोटा वितरण गरेको थियो ।
त्यही कोटामध्यको करिब ११ हजार मेट्रिक टन सुपारी आयात गर्न पाउने अदालतको आदेशपछि ३ सय ५४ मेट्रिक टन सुपारी विराटनगर भन्सार कार्यालय भएर आयात भएको हो । ७ करोड ८९ लाख ११ हजार मूल्यको सुपारी आयात हुँदा विराटनगर भन्सार कार्यालयलाई ३ करोड ८२ लाख ६० हजार रुपैया राजस्व प्राप्त भएको छ ।
तेश्रो मुलुकबाट आयात भएको सुपारीमा ४५ प्रतिशत भन्सार शुल्क, २५ प्रतिशत अन्त शुल्क र १३ प्रतिशत भ्याट लाग्दछ । सुपारी आयात शुरु भएपछि विराटनगर भन्सार कार्यालयको राजस्व लक्ष्य पूरा गर्न सहज हुने विराटनगर भन्सार कार्यालयका सूचना अधिकारी रामचन्द्र ढुंगानाले जानकारी दिए ।
विराटनगर भन्सार कार्यालयलाई चालू आर्थिक वर्ष २०७८/७९ का लागि ४९ अर्ब ६५ करोड ९५ लाख रुपैयाँ लक्ष्य तोकिएको छ ।
