दमक , २८ वैशाख । कोशी प्रदेशका SEE दिएका विद्यार्थीहरूलाई लक्षित गर्दै विराटनगरमा वृहत् प्राविधिक तथा व्यावसायिक शिक्षा मेला तथा सीप प्रदर्शनी आयोजना हुने भएको छ। कोशी प्रदेश सरकारको सामाजिक विकास मन्त्रालय र प्राविधिक शिक्षा तथा व्यावसायिक तालिम परिषद् (CTEVT) कोशी प्रदेश कार्यालयको संयुक्त आयोजनामा विराटनगरस्थित श्री आदर्श माध्यमिक विद्यालयमा आगामी २०८३ साल जेठ २ र ३ गते मेला सञ्चालन हुने जनाइएको छ।
“सीप आजको आवश्यकता, भविष्यको सुनिश्चितता” भन्ने नारासहित आयोजना हुन लागेको मेलाले SEE उत्तीर्ण विद्यार्थीलाई भविष्यको अध्ययन र करिअर छनोटमा सहयोग गर्ने अपेक्षा गरिएको आयोजकले जनाएको छ। मेलामा कोशी प्रदेशका १४ जिल्लाका विद्यालयबाट शिक्षक, विद्यार्थी, अभिभावक तथा जनप्रतिनिधिहरूको सहभागिता रहनेछ।
मेलामा स्वास्थ्य, इन्जिनियरिङ, कृषि, सूचना प्रविधि र हस्पिटालिटी लगायतका क्षेत्रमा अध्ययनरत विद्यार्थीहरूले प्रत्यक्ष सीप प्रदर्शन गर्नेछन्। साथै ४० वटा शैक्षिक स्टलमार्फत विभिन्न कलेज, तालिम प्रदायक संस्था र अध्ययन अवसरबारे जानकारी उपलब्ध गराइनेछ।
त्यसैगरी करिअर काउन्सेलिङ, छात्रवृत्ति तथा भर्ना प्रक्रिया सम्बन्धी जानकारी, रोजगार र उद्यमशीलतासम्बन्धी मार्गदर्शन तथा विशेषज्ञसँग प्रत्यक्ष अन्तरक्रिया कार्यक्रम पनि सञ्चालन गरिने जनाइएको छ।
मेलाको उद्घाटन जेठ २ गते बिहान ९ बजे हुने र दुई दिनसम्म चल्ने प्रदर्शनीमा हजारौँको सहभागिता रहने अपेक्षा गरिएको छ। आयोजकका अनुसार, प्रतिस्पर्धात्मक समयमा प्रमाणपत्रसँगै व्यवहारिक सीप आवश्यक भएकाले विद्यार्थीलाई समयमै सही करिअर मार्गदर्शन दिन मेला महत्वपूर्ण अवसर बन्ने विश्वास गरिएको छ।
