पथरी शनिश्चरे ६ जेठ / मोरङको पथरी शनिश्चरे नगरपालिका–१ स्थित पञ्चायत माध्यमिक विद्यालयले शैक्षिक सत्र २०८२ को माध्यमिक शिक्षा परीक्षा (एसईई) मा ४ जीपीए हासिल गर्न सफल छात्रा स्वीकृति निरौलालाई विशेष सम्मान गरेको छ ।
विद्यालय परिसरमा आयोजित सम्मान कार्यक्रममा स्वीकृतिको सर्वोत्कृष्ट नतिजाले विद्यालयसँगै समग्र नगरकै शैक्षिक प्रतिष्ठा बढाएको भन्दै ४ जीपीए ल्याउन सफल छात्रा स्वीकृतिलाई ५० हजार नगद तथा सम्मानपत्रले सम्मानित गरिएको छ । सम्मान कार्यक्रममा विद्यालयका प्रधानाध्यापक अर्जुनकुमार बुढाथोकीले निरन्तर मेहनत, अनुशासन र अध्ययनबाट उत्कृष्ट सफलता हासिल गर्न सकिने उल्लेख गर्दै अन्य विद्यार्थीलाई पनि प्रेरणा मिल्ने विश्वास व्यक्त गर्नुभएको थियो ।
छात्रा निरौलासहित विद्यालयबाट उत्कृष्ट नतिजा हासिल गर्ने अरु विद्यार्थीहरुलाई पनि सम्मान गरिएको हो । सोही कार्यक्रम मार्फत ३.६ जीपीए भन्दा माथि जीपीए हासिल गरेका ८ जना विद्यार्थीलाई हाल सोही विद्यालयले सञ्चालन गरिरहेका विज्ञान, व्यवस्थापन, मानविकी, शिक्षा, पत्रकारिता, कानुन लगायतका विभिन्न विषयहरूमा कक्षा ११ र १२ मा अध्ययन गर्दा कुनै पनि शुल्क नलाग्ने, ७५ हजार बराबरको छात्रावृत्ति प्रदान गरिने विद्यालयका प्रधानाध्यापक बुढाथोकीले घोषणा गर्नुभएको थियो ।
सामुदायिक विद्यालयबाट ४ जीपीए हासिल गर्नु गौरवको विषय भएको भन्दै आगामी दिनमा पनि उत्कृष्ट विद्यार्थीलाई प्रोत्साहन गर्ने कार्यक्रमलाई निरन्तरता दिइने विद्यालय प्रशासनले जनाएको छ ।
वडा नम्बर १ का वडाध्यक्ष भीमकुमार राईको अध्यक्षतामा सम्पन्न भएको कार्यक्रममा विद्यालयका व्यवस्थापन समितिका पूर्व अध्यक्ष युवराज बास्कोटा, पथरी शनिश्चरे नगरपालिकाका शिक्षा, युवा तथा खेलकुद शाखा प्रमुख नवीन खुलाल बुढाथोकी, विद्यालयका सञ्चालक समितिका पदाधिकारीहरू , शिक्षक विद्यार्थी तथा अभिभावकहरूको बाक्लो उपस्थिति रहेको थियो ।
