दमक,२८ जेठ । आफ्नो जन्मदिनलाई भड्किलो र खर्चिलो तरिकाले मनाउने आधुनिक संस्कार बढिरहेका बेला झापाको कमल गाउँपालिकाका एक व्यवसायीले भने अनाथ बालबालिकाहरूसँग बसेर आत्मीय रूपमा जन्मदिन मनाउनु भएको छ। लामो समयदेखि मलेसियालाई आफ्नो कर्मथलो बनाएर व्यवसाय गर्दै आउनुभएका कमल गाउँपालिका निवासी डिल्ली न्यौपानेले आफ्नो जन्मदिनको अवसरमा परोपकारी कार्य गर्नुभएको हो।
हाल नेपाल आउनुभएका न्यौपानेले आफ्नो परिवारसहित दमक–९ मा रहेको अनाथ बाल–वृद्धाश्रममा पुगेर त्यहाँ रहेका साना बालबालिकाहरूलाई विभिन्न प्रकारका मीठा र पोसिला खानेकुराहरू खुवाउनु भएको छ। जन्मदिनको अवसरमा व्यवसायी न्यौपानेले आश्रमका बालबालिकाहरूका लागि दैनिक रूपमा आवश्यक पर्ने खाजा तथा खाद्य सामग्रीसमेत सहयोग हस्तन्तरण गर्नुभएको छ।
न्यौपानेले आफ्नै हातबाट मिठा परिकारहरू पस्किएर खुवाउँदा आश्रमका साना नानीबाबुहरूको मुहारमा छुट्टै उत्साह र खुसी छाएको थियो। बालबालिकाहरूको त्यो अबोध र प्रफुल्लित मुहार देख्दा न्यौपाने परिवारमा पनि एउटा बेग्लै आत्मसन्तुष्टि र खुसी सञ्चार भएको देखिन्थ्यो।
लामो समय परदेशमा रहे पनि आफ्नो गाउँठाउँ र समाजप्रतिको उत्तरदायित्वलाई भुल्न नसकिने बताउँदै व्यवसायी डिल्ली न्यौपानेले नेपाल आएको मौकामा अनाथ र असहाय बालबालिकाहरूलाई थोरै भए पनि सहयोग पुगोस् र उनीहरूको ओठमा हाँसो आओस् भन्ने पवित्र मनसायले यो कार्य गरेको बताउनुभयो। जन्मदिनमा गरिने फजुल खर्चलाई कटौती गरेर यस्ता सामाजिक र मानवीय कार्यमा लगाउन सके समाजमा सकारात्मक सन्देश जाने उहाँको भनाइ छ।
यस उदाहरणीय कार्यले समाजका अन्य व्यक्तिहरूलाई पनि आफ्नो उत्सव तथा सामाजिक कार्यक्रमहरूमा असहाय र विपन्न वर्गलाई सम्झिन प्रेरणा मिल्ने विश्वास गरिएको छ।
