दमक | ११ असार | तपाईलाई सुन्दा अपत्यारिलो लाग्ला । विद्यार्थी अध्ययन गर्ने थलोमा “स्मोकिङ जोन” पनि बन्नेछ ।
यदि तपाईं नेपाल बाहिरका अन्तरास्ट्रिय क्याम्पसमा अध्ययन गरिरहनुभएको छ भने यो नौलो कुरा नहुन सक्छ । तर नेपालमा भने यो नौलो अभ्यास हुन सक्छ ।
दमकमा रहेको दमक बहुमुखी क्याम्पसले अब “स्मोकिङ जोन” समेत बनाउने भएको छ ।
क्याम्पसलाई अन्तरास्ट्रिय मापदण्डमा पुर्याउन आवश्यक विभिन्न संचरना निर्माण मध्ये “स्मोकिङ जोन” समेत आवश्यक पर्ने भएकोले यसखाले संचरना बनाउन लागिएको दमक बहुमुखी क्याम्पसका सहायक क्याम्पस प्रमुख पारस आचार्यले जानकारी दिनु भयो । योसगै क्याम्पसहाता भित्रै बेग्लै “स्विमिङ पुल” समेत बनाउने गरि योजना अघि बढेको समेत उहाले जानकारी गराउनु भएको छ ।
बिहिवार दमक क्याम्पसमा स्वतन्त्र विद्यार्थी युनियनले आयोजना गरेको नव आगन्तुक विद्यार्थीलाई स्वागत सम्मान तथा फेरि भेटौला कार्यक्रममा क्यामपसका तर्फबाट बोल्दै प्राध्यापक आचार्यले क्यामपसले शैक्षिक साथै संरचनात्मक र भौतिक निर्माणमा समेत सुधार गर्दै अघि बढ्ने योजना सुनाउनु भएको थियो ।
यसै शैक्षिक सत्रदेखि स्नातक तहको बीबीएस कार्यक्रम अध्ययन गर्ने विद्यार्थीहरूको ट्रान्सक्रिप्ट क्याम्पस आफैले झिकाएर उपलब्ध गराउने व्यवस्था मिलाइएको उहाँले जानकारी दिनुभयो।
ट्रान्सक्रिप्ट प्राप्तिका लागि विद्यार्थीले अनावश्यक झन्झट बेहोर्नुपर्ने अवस्था अन्त्य गर्न तथा बिचौलियामार्फत हुने अतिरिक्त आर्थिक भार रोक्न यो व्यवस्था लागू गरिएको आचार्यको भनाइ छ।
उहाँका अनुसार विद्यार्थीले डिन कार्यालयमा बुझाउनुपर्ने आधिकारिक शुल्कबाहेक कुनै अतिरिक्त रकम तिर्नुपर्ने छैन। आवश्यक प्रक्रिया पूरा भएपछि क्याम्पसले नै ट्रान्सक्रिप्ट झिकाएर सम्बन्धित विद्यार्थीलाई वितरण गर्नेछ।
क्याम्पस प्रशासनले शैक्षिक गुणस्तर, आधुनिक पूर्वाधार र विद्यार्थी सेवाको प्रभावकारिता बढाउँदै संस्थालाई प्रतिस्पर्धी तथा आकर्षक शैक्षिक गन्तव्यका रूपमा स्थापित गर्ने लक्ष्य लिएको जनाएको छ।
