इलाम ,२५ असार । अविरल वर्षा र विपद्का कारण इलाममा देखिएको सडक अवरोध तथा अत्यावश्यक सामग्री आपूर्तिको समस्या समाधानका लागि सांसद सुहाङ नेम्वाङले सरकारको ध्यानाकर्षण गराएका छन्।
इलाम क्षेत्र नम्बर २ का सांसद नेम्वाङले मेची राजमार्गको माइखोला सडक खण्ड, झापा–इलाम फास्ट ट्र्याकअन्तर्गतको बेलासे सडक खण्ड, सिमलगोलाई सडक खण्ड तथा गजुरमुखीदेखि देउमाई जाने पक्की पुल क्षतिग्रस्त हुँदा यातायात सेवा प्रभावित भएको भन्दै तत्काल समाधानका लागि प्रधानमन्त्री तथा मन्त्रिपरिषद् कार्यालयमा आग्रह गरेका हुन्।
सडक अवरुद्ध हुँदा एम्बुलेन्स सेवा, खाद्यान्न, ग्यास, पेट्रोलियम पदार्थलगायत अत्यावश्यक सामग्रीको आपूर्तिमा समस्या देखिएको उनले बताए।
सांसद नेम्वाङले प्रधानमन्त्रीको सचिवालयसँग छलफल गरी समस्या समाधानका लागि सम्बन्धित मन्त्रालय र जिल्ला प्रशासन कार्यालयमार्फत काम अघि बढाइएको जानकारी दिएका छन्।
उनका अनुसार सडक सञ्चालन, वैकल्पिक बाटोको व्यवस्था तथा अत्यावश्यक सामग्री आपूर्ति सहज बनाउने विषयमा पहल भइरहेको छ।
प्रधानमन्त्रीको सचिवालयबाट पनि तत्काल प्रतिक्रिया आएको र समस्या समाधानका लागि निरन्तर छलफल भइरहेको सांसद नेम्वाङले बताएका छन्।
उनले विपद्को कठिन अवस्थामा जिल्लावासीलाई धैर्य राख्न आग्रह गर्दै आफू इलामवासीको समस्या समाधानका लागि निरन्तर सक्रिय रहने प्रतिबद्धता व्यक्त गरेका छन्।
