जनकपुरधाम, २७ असार ।धनुषाको मिथिला नगरपालिका–९ बडहरीस्थित पूर्व–पश्चिम राजमार्गमा शनिबार बिहान उपमेयर सवार सरकारी गाडी र एम्बुलेन्स एकआपसमा ठोक्किँदा आठ जना घाइते भएका छन्।
नेपाल प्रहरीका अनुसार ढल्केवरबाट बर्दिबासतर्फ जाँदै गरेको धनुषाधाम नगरपालिकाकी उपमेयर विद्या भुजेल सवार प्रदेश २–०२–००१ झ ००८२ नम्बरको स्करपियो गाडी र विपरीत दिशा बडहरीबाट बिरामी लिएर विराटनगरतर्फ जाँदै गरेको ना २ च २३२ नम्बरको एम्बुलेन्स बिहान एकआपसमा ठोक्किएर दुर्घटना भएको हो।
दुर्घटनामा एम्बुलेन्स चालकसहित त्यसमा सवार पाँच जना र सरकारी गाडीमा रहेका उपमेयरसहित तीन जना गरी कुल आठ जना घाइते भएका छन्। घाइते सबैलाई उपचारका लागि धनुषाकै रमदैयास्थित जानकी मेडिकल कलेज पठाइएको प्रहरीले जनाएको छ।
घाइतेहरूको विवरण र अवस्थाः
प्रहरीका अनुसार एम्बुलेन्समा सवार यात्रुमध्ये ४० वर्षीया रेणु कुमारी महतो मध्यम घाइते भएकी छन् भने अन्यको अवस्था सामान्य छ।
सामान्य घाइते ४९ वर्षीय चालक दिपेन्द्रकुमार महतो, ४५ वर्षीय बसन्तकुमार सिंह, ६० वर्षीया राजु देवी र ६५ वर्षीय लक्ष्मी महतो। धनुषाधाम नगरपालिकाकी उपमेयर ६५ वर्षीया विद्या भुजेल, ७० वर्षीय भीमराज भुजेल र ५० वर्षीय चालक बद्री भुजेल।
दुर्घटनाको कारणबारे प्रहरीले थप अनुसन्धान गरिरहेको जनाएको छ।
