विराटनगर,१२ साउन । सुनसरीको देवानगञ्ज गाउँपालिका–३ कप्तानगञ्जमा भएको गोलीकाण्डपछि उत्पन्न तनावको प्रभाव छिमेकी जिल्ला मोरङको विराटनगरसम्म पुगेको छ। बिग्रँदो सुरक्षा अवस्थालाई ध्यानमा राख्दै मंगलबार विराटनगरका अधिकांश विद्यालय तथा कलेजहरूमा पठनपाठन प्रभावित भएको छ। आइतबार राति कप्तानगञ्जमा दुई समूहबीच भएको झडप नियन्त्रणमा लिन प्रहरीले गोली चलाउँदा एक स्थानीयको मृत्यु भएको थियो भने नौ जना घाइते भएका थिए। उक्त घटनाको विरोधमा प्रदर्शन जारी रहेपछि त्यसको प्रत्यक्ष असर शैक्षिक क्षेत्रमा परेको हो।
सोमबार विराटनगरमा समेत प्रदर्शन भएपछि मंगलबार सुरक्षा जोखिम हुनसक्ने आकलन गर्दै धेरैजसो निजी तथा सामुदायिक शिक्षण संस्थाले कक्षा सञ्चालन नगर्ने निर्णय गरेका हुन्। विराटनगर महानगरपालिकाका शिक्षा महाशाखा प्रमुख राम प्रसाद ढुंगेलका अनुसार महानगरले बिदाको औपचारिक निर्णय नगरेको भए पनि विद्यालयहरूले आफैं पठनपाठन स्थगित गरेका हुन्। सवारी साधन सञ्चालनमा अवरोध र विद्यार्थी तथा शिक्षकको सुरक्षालाई मध्यनजर गर्दै शैक्षिक संस्थाहरू बन्द गरिएका हुन्।
घटनाबाट प्रत्यक्ष प्रभावित सुनसरीका देवानगञ्ज र हरिनगर गाउँपालिकाले भने मंगलबार शोक स्वरूप सार्वजनिक बिदा दिएका छन्। जसका कारण त्यहाँका सरकारी कार्यालय, विद्यालय तथा सार्वजनिक निकाय पूर्ण रूपमा बन्द रहे। तनावग्रस्त क्षेत्रमा शान्ति–सुरक्षा कायम राख्न स्थानीय प्रशासनले नेपाल प्रहरी, सशस्त्र प्रहरी र नेपाली सेनाको टोली परिचालन गरेको छ। प्रशासनले अफवाहको पछि नलाग्न, अपुष्ट सूचना नफैलाउन र शान्ति कायम राख्न सर्वसाधारणलाई आग्रह गर्दै घटनाको अनुसन्धान जारी रहेको र दोषीमाथि कडा कारबाही हुने जनाएको छ।
