काठमाडौं,१४ साउन । नेपाली कम्युनिष्ट पार्टी (नेकपा)का संयोजक पुष्पकमल दाहाल प्रचण्डले देशको वर्तमान राजनीतिक अवस्था सहज नरहेको बताउनु भएको छ । बिहीबार बसेको प्रतिनिधिसभा बैठकमा बोल्दै उहाँले राष्ट्रिय एकता, सामाजिक सद्भाव र संवाद मार्फत समस्या समाधान गर्न सबै पक्षलाई आग्रह समेत गर्नु भयो।
बिहीबार बसेको प्रतिनिधिसभा बैठकमा बोल्दै उहाँले गत निर्वाचनका क्रममा जनतासामु गरिएका प्रतिबद्धता अनुसार सरकार अघि बढ्न नसकेको टिप्पणी गर्नु भयो। सरकारका गतिविधिले जनअपेक्षा पूरा गर्न नसकेको भन्दै दिनप्रतिदिन परिस्थिति अझ असहज बन्ने चिन्ता बढ्दै गएको उल्लेख गर्नु भएको छ । उहाँले भन्नु भयो, ‘अहिले देशको समग्र राजनीतिक परिस्थिति सहज छैन । सदनमा तर्क वितर्क चलिरहेको छ । गत निर्वाचनमा गरिएको वाचा र अभिमत अनुसार काम भएको छैन् । सरकारका क्रियाकलापले जनताको अपेक्षालाई सम्बोधन गर्न सकेको छैन् । बरु दिन प्रतिदिन परिस्थिति अझ असहज हुने हो कि भन्ने चिन्ता व्याप्त भएको छ ।’
प्रचण्डले सुनसरीमा भएको घटनाप्रति गम्भीर चिन्ता व्यक्त गर्दै सदनमार्फत सम्पूर्ण नेपालीलाई शान्ति, सद्भाव र संयमता अपनाउन अपिल गर्नु भएको छ। उहाँले नेपाली समाजको ऐतिहासिक विशेषता धार्मिक सहिष्णुता, सामाजिक सद्भाव र राष्ट्रिय एकता रहेको उल्लेख गर्दै कठिन परिस्थितिमा पनि संवाद र सहकार्यबाट समस्या समाधान गर्ने परम्परालाई निरन्तरता दिनुपर्ने बताउनु भएको छ । सुनसरी, मोरङल गायतका क्षेत्रमा देखिएका तनावप्रति सचेत रहन आग्रह गर्दै उहाँले कुनै पनि विवादलाई संवाद र सहकार्यको माध्यमबाट समाधान गर्नुपर्नेमा जोड दिनु भएको छ ।
उहाँले भन्नु भयो, ‘सुनसरी–मोरङ लगायत अन्य क्षेत्रमा जे परिस्थिति देखा परेको छ । उक्त परिस्थितिका सन्दर्भमा संवाद र सहकार्य माध्यमबाट समाधान गर्ने र आम जनताको एकताको माध्यमबाट देशभित्र घोचपेच गर्नखोज्ने परिस्थितिलाई अझ असहज बनाउन खोज्ने प्रवृत्तिको अन्त्य गर्न अपिल गर्दछु ।’
