इनरुवा, १५ साउन। सुनसरीको देवानगञ्ज गाउँपालिका–३ कमानागाछीमा साउन १० गते भएको घटनामा ज्यान गुमाएका ओमप्रकाश मेहता र जयप्रकाश मेहताका परिवार तथा गृह मन्त्रालयबीच ७ बुँदे सम्झौता भएको छ।
शुक्रबार बिहान देवानगञ्जमै भएको छलफलपछि गृहमन्त्री सुदन गुरुङ र मृतकका परिवारका अभिभावकबीच सम्झौतापत्रमा हस्ताक्षर भएको हो। सम्झौतासँगै घटनापछि जारी आन्दोलन अन्त्य गर्ने सहमति पनि भएको जनाइएको छ।
सम्झौताअनुसार नेपाल सरकारले मृतकद्वयलाई शहीद घोषणा गर्ने प्रक्रिया तत्काल अघि बढाउने प्रतिबद्धता जनाएको छ। साथै, मृतकका परिवारलाई प्रति परिवार १० लाख रुपैयाँ राहत उपलब्ध गराइने उल्लेख गरिएको छ।
त्यसैगरी, साउन १० गते भएको घटनाको निष्पक्ष र प्रभावकारी छानबिन गरी दोषीमाथि प्रचलित कानुनबमोजिम आवश्यक कारबाही प्रक्रिया तत्काल अघि बढाइने सहमति भएको छ। देवानगञ्ज–३ स्थित मदरसाको कानुनी हैसियत तथा सम्बन्धित विषयमा आवश्यक छानबिन सुरु गर्ने पनि सम्झौतामा उल्लेख छ।
सम्झौतामा प्रत्येक मृतकका परिवारबाट एक जना योग्य सदस्यलाई रोजगारीको अवसर उपलब्ध गराउने, छानबिन समितिको प्रतिवेदनका सुझाव तथा सिफारिस कार्यान्वयन गर्ने र मृतकहरूको सम्मानमा स्थानीय सरकारसँग समन्वय गरी उपयुक्त स्थानमा स्मृति पार्क निर्माण गर्ने विषय पनि समावेश गरिएको छ।
सम्झौतापछि घटनासँग सम्बन्धित आन्दोलनका कार्यक्रम स्थगित हुने र सहमतिका बुँदाहरू कार्यान्वयनका लागि दुवै पक्षले आवश्यक समन्वय गर्ने प्रतिबद्धता व्यक्त गरेका छन्।
