काठमाडौं,२२ साउन । श्रमसंस्कृति पार्टीका सांसद ध्रुवराज राईले लामो समयदेखि जारी संसद्को गतिरोध अन्त्य गरी जनताका मुद्दामा केन्द्रित हुन सबै राजनीतिक दललाई आग्रह गर्नु भएको छ्। उहाँले निरन्तरको अवरोधले संसद्को समय खेर गएको र जनतामा गलत सन्देश गएको बताउनु भयो। शुक्रबार बसेको प्रतिनिधिसभा बैठकमा बोल्दै सांसद राईले संसद् अवरुद्ध भइरहँदा जनताले आफ्ना प्रतिनिधिलाई हेरिरहेको भन्दै जतिसक्दो छिटो राजनीतिक सहमति मार्फत निकास निकाल्नुपर्ने बताउनु भयो।
उहाँले भन्नु भयो, ‘म चाहिँ यो विषयमा अगाडिदेखि नै सकेभर छिटो टुङ्ग्याऔँ भन्ने पक्षमा छु। जनताले तपाईं–हामीलाई उनीहरूको प्रतिनिधि बनाएर पठाएका हुन्। उहाँहरू हामीलाई हेरिरहनुभएको छ। यस्तो अवस्थामा हामीले कति वर्षसम्म यही विषयमा मात्रै छलफल गरिरहने ? समस्याको समाधान खोज्नैपर्छ।’उहाँले संसदमा आफ्नो पार्टीले संकल्प प्रस्तावसमेत अघि सारेको स्मरण गर्दै राजनीतिक दलहरूले एकअर्कालाई दोषारोपण गर्नेभन्दा समाधानमा केन्द्रित हुनुपर्ने धारणा राख्नु भयो।उहाँले भन्नु भयो, ‘देशलाई माया गर्ने हो भने कसले के भन्यो भनेर मात्र बस्ने होइन, समाधान खोज्नुपर्छ। मान्छेबाट गल्ती हुन सक्छ, तर गल्ती स्वीकार गरेर समस्याको निकास निकाल्नुपर्छ। समाधान नखोज्ने हो भने हामी कहिलेसम्म यही ढंगले अघि बढ्ने ?’
दलका नेता, प्रधानमन्त्री र सभामुखबीच छलफलमार्फत छिट्टै निष्कर्ष निकाल्नुपर्ने आवश्यकता औंल्याउँदै उहाँले संसद् सञ्चालनलाई प्रभावकारी बनाउन आग्रह गर्नु भयो।उहाँले भन्नु भयो, ‘दुई–दुई महिना सदन अवरुद्ध भइरहने हो भने बरु दलका नेता, प्रधानमन्त्री र सभामुख बसेर यसको निष्कर्ष निकाल्नुपर्छ। यसको समाधान सडकमा होइन, यही संसद्भित्र खोजिनुपर्छ।’सांसद राईले संसद् अवरोधका कारण समय र स्रोतको दुरुपयोग भइरहेको उल्लेख गर्दै सांसदहरूले आफ्नो समय जनताका समस्या उठाउन खर्चिनुपर्ने बताउनु भयो।
उहाँले भन्नु भयो, ‘एक जना सांसदले चार मिनेट मात्रै बोल्दा पनि हरेक बैठकमा हामीले कति समय खेर फालिरहेका छौँ भन्ने हिसाब गर्नुपर्छ। यो जनताको अपेक्षाअनुसारको काम होइन।’सरकारले दिएको स्पष्टीकरणबारे आफूहरूले अध्ययन गरेको उल्लेख गर्दै उहाँले उठाइएका विषयको अझै प्रभावकारी समाधान हुन नसकेको बताउनु भयो।उहाँले भन्नु भयो, ‘सरकारले दिएको स्पष्टीकरणका विषयमा हामीले अध्ययन गरेका छौँ। जनताले पनि सबै कुरा देखिरहनुभएको छ। धेरै विषय उठे, तर अहिलेसम्म त्यसको उचित समाधान भएको छैन भन्ने हाम्रो निष्कर्ष छ। त्यसैले सभामुखज्यूको पहलमा समस्याको समाधानको एउटा बिन्दु खोजौँ। संसद्लाई फेरि दुर्गन्धित बनाउने होइन, निकास दिने बाटो खोज्नुपर्छ।’
