दमक, २७ साउन ।बालबालिकाको अधिकार, सहभागिता र पहुँच सुनिश्चित गर्ने उद्देश्यसहित दमक नगरपालिका–३ लाई बालमैत्री उन्मुख वडा घोषणा गर्ने तयारी पूरा भएको छ। नेपाललाई बालमैत्री राष्ट्र बनाउने सरकारको योजनाअनुसार स्थानीय तहबाटै बालमैत्री वडा घोषणा गर्दै क्रमशः पालिका, प्रदेश हुँदै वि.सं. २०८७ सम्ममा नेपाललाई नै बालमैत्री राष्ट्र घोषणा गर्ने लक्ष्य राखिएको छ। सोही अभियानअन्तर्गत दमक–३ ले आवश्यक प्रक्रिया र मापदण्ड पूरा गरी बालमैत्री उन्मुख वडा घोषणाका लागि तयारी पूरा गरेको हो।
वडा बालमैत्री घोषणाका लागि आवश्यक सबै चरण र प्रक्रिया पूरा भएपछि सोमबार दमक–३ वडा कार्यालयमा जिल्ला समन्वय समिति झापा, दमक नगरपालिका तथा सरोकारवाला निकायका प्रतिनिधिको टोलीले वडाको अवस्थाबारे स्थलगत अवलोकन गरेको थियो। अवलोकनका क्रममा वडाको वर्तमान अवस्था र बालमैत्री सूचकसम्बन्धी तयार पारिएको कार्यपत्र शिक्षक शेषकुमार निरौलाले प्रस्तुत गर्नुभएको थियो। कार्यपत्रमा प्रस्तुत तथ्यका आधारमा दमक–३ बालमैत्री उन्मुख वडा घोषणा गर्न योग्य रहेको निष्कर्ष निकालिएको थियो।
सोही आधारमा जिल्ला समन्वय समिति झापाका प्रमुख विश्वराज बरालले दमक–३ लाई बालमैत्री उन्मुख वडा घोषणाको प्रमाणपत्र दिने प्रतिवद्धता समेत व्यक्त गर्नुभयो । कार्यक्रममा बोल्दै दमक नगरपालिकाका प्रमुख राम कुमार थापाले दमकका सबै वडालाई आगामी भदौभित्र बालमैत्री घोषणा गर्ने तयारी भइरहेको बताउनुभयो। उहाँले आगामी भदौ गते बाल दिवसका अवसरमा दमक नगरपालिकालाई नै बालमैत्री नगर घोषणा गर्ने तयारी समेत भइरहेको जानकारी दिनुभयो।
वडाध्यक्ष नवीन बरालको अध्यक्षतामा सम्पन्न कार्यक्रममा वडाका विभिन्न सरोकारवाला तथा शिक्षा क्षेत्रका प्रतिनिधिको सक्रिय सहभागिता रहेको थियो। बालमैत्री उन्मुख वडा घोषणाले बालबालिकाको शिक्षा, स्वास्थ्य, संरक्षण, सहभागिता तथा विकासका अधिकारलाई स्थानीय तहको नीति र अभ्याससँग जोड्दै लैजान थप आधार तयार गरेको जनाइएको छ।
