बाजुरा,२९ साउन । बाजुरामा पहिरोमा परि बेपत्ता हुनु भएकी प्रतीक्षा थापा मृत भेटिनु भएको छ । पहिरोमा परेर बेपत्ता हुनु भएकी २० वर्षीय प्रतीक्षा थापाको खोजतलास गर्ने क्रममा मृत भेटिनु भएको हो ।पहिरोले पुरिएको अवस्थामा उहाँको शव भेटिएपछि गाउँ शोकाकुल बनेको छ।अविरल वर्षाले गर्दा बाजुराको त्रिवेणी नगरपालिका ताम्सुमा घर माथिबाट पहिरो गएको थियो।पहिरोमा परेर सोही ठाउँ बस्ने धौली देवी रावल र अन्दाजी ४० वर्षका धर्म थापा घाइते हुनु भएको थियो ।
घाइते भएकाहरूलाई उपचारको लागी जिल्ला अस्पताल ल्याइएको छ । बिहीबार राति देखिको अविरल वर्षापछि ताम्सु बस्ने ३९ वर्षीय धर्म थापा र ४३ वर्षीय कर्णबहादुर थापाको घर पहिरोले पुरिएको जिल्ला प्रहरी कार्यालय बाजुराले जनाएको छ ।घटनापछि जिल्ला प्रहरी कार्यालयका प्रमुख प्रहरी नायव उपरीक्षक (डिएसपी) शैलेश्वरी बोहराको कमान्डमा १७ जना प्रहरी टोली आवश्यक उद्धार सामग्रीसहित घटनास्थलतर्फ खटिएको थियो ।
पहिरोका कारण गाउँ थप जोखिममा देखिएको छ । पहिरोको अवस्था, घाइतेको उपचार र उद्धार, तथा क्षति विवरण बुझ्न र सुरक्षित बासका लागि पहल गर्ने बारे जानकारी लिन त्रिवेणी नगरपालिकाका प्रमुख—उपप्रमुखको टोली घटना स्थलमा छन् । बाजुरा प्रहरी प्रमुख, नेपाली सेना,सशस्त्र सबैको टोली उद्धारमा सक्रिय छन् ।गएरातिको भारी वर्षाले जिल्लाको जनजीवन अस्तव्यस्त र कष्टकर बनेको छ । बुढीगंगामा २ मा घर पसलमा क्षति पुगेको छ । गौमुल—२ मा पनि एक घर भत्किएको छ । पैदल बाटा घाटा अवरुद्ध अवस्थामा छन् । सडक क्षेत्र पनि पहिरो र पानीले ठाउँ ठाउँमा असहज बनेको छ । बाजुरामा बर्सेनि अविरल वर्षापछि बाढी पहिरोले धनजनको क्षति हुने गरेको छ ।
