काठमाडौं ,२९ साउन। डा.धवलशम्शेर राणाले नयाँ राजनीतिक दल ‘जय नेपाल पार्टी’ दर्ता गराउनु भएको छ । शुक्रबार राणाले नयाँ पार्टी दर्ताका लागि निर्वाचन आयोग पुग्नु भएको छ ।
दल दर्तापछि सञ्चारकर्मीसँग कुरा गर्दै राणाले दुर्गा प्रसाईंलाई पार्टीमा सहभागी हुन स्वागत गर्ने बताउनु भएको छ । उहाँले प्रसाईं र आफूहरूबीच पछि सहकार्य हुने जानकारी दिनु भयो ।
‘हामी दुर्गा प्रसाईंको प्रतीक्षामै छौँ । उहाँ आउनुहुन्छ भने स्वागत नै छ । अहिले जय नेपाल पार्टी दर्ता भएको छ । दुर्गा प्रसाईंजी हुनुहुन्न । उहाँले हामी पछि मिल्छौँ भन्नुभएको छ,’ राणाले भने ।
राणाका अनुसार जय नेपाल पार्टीले चुनाव चिह्नका रूपमा ‘त्रिभुज’ पाएको छ । त्रिभुजलाई हिमाल, पहाड र तराई तथा सनातन धर्म, राजसंस्था र प्रजातन्त्रका रूपमा व्याख्या गरिएको उहाँले बताउनु भयो । पार्टीको झण्डा सेतो रंगको हुने र त्यसमा रातो त्रिभुज रहने उहाँले जानकारी दिनु भयो ।
राणाले आगामी स्थानीय तहको निर्वाचनलाई लक्षित गर्दै पार्टी दर्ता गरिएको बताउनु भयो । उहाँका अनुसार जय नेपाल पार्टीले देशभरका सबै स्थानीय तहको निर्वाचनमा सहभागी हुने तयारी गरेको छ ।
‘स्थानीय तहको निर्वाचनका लागि नै हामीले तयारी गर्न दल दर्ता गरेका हौँ । सम्पूर्ण स्थानीय तहको निर्वाचनमा हामी सहभागी हुन्छौँ,’ उहाँले भन्नु भयो ।
उहाँले स्थानीय तहमा सेवा गर्न इच्छुक र इमानदारीपूर्वक काम गर्न चाहने नेपाली नागरिकलाई जय नेपाल पार्टीबाट निर्वाचनमा सहभागी हुन आवेदन दिन आह्वानसमेत गर्नुभयो।
