काठमाडौं ,१२ भदौ । रसुवास्थित प्रहरी चौकी बेत्रावतीमा कार्यरत प्रहरी सहायक निरीक्षक (असई) रामकाजी पौडेल मृत भेटिनु भएको छ।
तिब्बतबाट भोटेकोशीमा आएको बाढीमा परेर बेपत्ता भएका ४३ वर्षीय पौडेलको शव चितवनमा फेला परेको हो।
नुवाकोट घर भएका पौडेलको शव फेला परेको जिल्ला प्रहरी कार्यालय चितवनका डीएसपी चन्द्रभूषण यादवले जानकारी दिनु भयो।
चितवन जिल्ला अस्पतालमा पोस्टमार्टमपछि परिवारले उहाँको शव बुझेको प्रहरीले जनाएको छ।
यसैबीच, चितवनमा फेला परेको अर्को शवको पनि सनाखत भएको छ। बाँकेको कोहलपुर नगरपालिका–११ का २३ वर्षीय कविलाल चौधरीको पहिचान खुलेको हो।
उहाँको शव पनि परिवारलाई जिम्मा लगाइएको डीएसपी यादवले जानकारी दिनु भयो।
