काठमाडौं, १२ भदौ । सरकारले सहसचिव इन्दु घिमिरेलाई सचिवमा बढुवा गरेको छ।
शुक्रबार सिंहदरबारमा बसेको मन्त्रिपरिषद् बैठकले घिमिरेलाई विशिष्ट श्रेणी (सचिव) मा बढुवा गर्दै रक्षा मन्त्रालयको सचिवमा पदस्थापन गर्ने निर्णय गरेको हो।
बढुवा सिफारिस समितिले घिमिरेलाई पहिलो नम्बरमा सिफारिस गरेको थियो। सोही सिफारिसका आधारमा मन्त्रिपरिषद्ले उनलाई सचिवमा बढुवा गरेको हो।
सचिवमा बढुवा हुनुअघि घिमिरे संस्कृति, पर्यटन तथा नागरिक उड्डयन मन्त्रालयमा सहसचिवका रूपमा कार्यरत हुनुहुन्थ्यो।
यसअघि रक्षा मन्त्रालयका सचिव केदारनाथ शर्मा गृह मन्त्रालयमा सरुवा भएपछि रिक्त पदमा घिमिरेलाई जिम्मेवारी दिइएको हो।
