बाठमान्डौ,१७ भदौ । श्रम संस्कृति पार्टीको धरानमा जारी केन्द्रीय समिति बैठकको दोस्रो दिन बुधबार वरिष्ठ नेता सुदन किराँतीसहितका नेताहरू सहभागी भएका छन्।
मंगलबार सुरु भएको बैठकको पहिलो दिन किराँती नेतृत्वको समूहलाई सहभागी नगराइएपछि पार्टीभित्र असन्तुष्टि बढेको चर्चा भएको थियो।
तर, अध्यक्ष हर्क साम्पाङ र वरिष्ठ नेता किराँती दुवै पक्षले पहिलो दिन पूर्वकमिटीको बैठक र दोस्रो दिन संयुक्त बैठक बस्ने कार्यतालिका पहिल्यै तय भएको बताएका छन्।
किराँती नेतृत्वको समूहसँग एकता भएपछि पार्टीको केन्द्रीय समिति २३ बाट बढेर ४१ सदस्यीय बनेको थियो। एकताका क्रममा किराँतीलाई वरिष्ठ नेताको जिम्मेवारी दिइएको थियो।
किराँती पक्षले भने अध्यक्ष साम्पाङको कार्यशैलीप्रति असन्तुष्टि जनाउँदै पार्टी सामाजिक सञ्जालको घोषणाभन्दा विधि, पद्धति र सामूहिक निर्णयका आधारमा सञ्चालन हुनुपर्ने विषय बैठकमा उठाउने तयारी गरेको जनाएको छ।
