बिर्तामोड ,१८ भदौँ। अवैध रुपमा स्वास्थ्य जाँच र औषधी बिक्री गरी नेटवर्किङ व्यवसायमार्फत सर्वसाधारणलाई ठगी गरेको आरोपमा पक्राउ परेका ग्लोवल ओरियन्सका ४१ जना माथि प्रहरीले मुद्धा चलाउने भएको छ ।बिर्तामोड ५ स्थित बुद्धनगरमा रहेको ग्लोबल ओरियन्सको कार्यालयमा बुधबार दिउँसो ३ बजेतिर इलाका प्रहरी कार्यालय बिर्तामोडका डीएसपी सन्तोष पाठक नेतृत्वको प्रहरी टोलीले छापा मारेको थियो ।
त्यसक्रममा इलाम घर भएका अर्जुनधारा मल्टीे पर्पोजका संचालक सुजन लिम्बू, ग्लोबल ओरियन्सका शाखा प्रमुख पिताम्बर कट्टेल सहित २२ जना महिला र १९ जना पुरुष पक्राउ परेका थिए । प्रहरीले औषधी , चेकजाँच गर्ने मेशिन , कागजात र केही नगद बरामद गरेको छ । पक्राउ परेका महिलाहरुलाई जिल्ला प्रहरी कार्यालय भद्रपुर लगिएको छ भने पुरुषहरुलाई इलाका प्रहरी कार्यालय बिर्तामोडमा राखिएको छ । सर्वसाधारणलाई ठगीसंगै ग्लोबल ओरियन्समा काम गर्न आएका तेह्रथुमका एकजना युवक वेपत्ता भएका छन् । ती युवकका बुवाले प्रहरीमा उजुरी दिएका छन् । बुधबार पक्राउ परेकाहरु माथि आज बिहिबार मुद्धा दर्ता गरिने प्रहरी स्रोतले जनाएको छ । प्रहरीले हिजोको घटनाबारे प्रेस विज्ञप्तिमार्फत सार्वजनिक गर्न लागेको जनाएको छ ।
शैक्षिक परामर्श र तालिम गराउने उद्धेश्यले खोलिएको अर्जुनधारा मल्टी पर्पोज नामक कम्पनीसंग मिलेर ग्लोबल ओरियन्सले अवैध रुपमा स्वास्थ्य जाँच गर्नुका साथै औषधी बिक्री वितरण गर्दै आएको थियो । होलबडी चेक गरिदिने भन्दै कक्षा १२ पढेका पिताम्बर कट्टेलले एउटा मेशिनबाट स्वास्थ्य जाँच गराउँदै आएका थिए । चेकजाँच गरेवापत् एक हजार रुपैयाँ शुल्क लिने गरेका थिए । उनीहरुले सबै रोग निको पारिदिने भन्दै गाउँका सर्वसाधारणलाई झुक्यानमा पार्दै आएका थिए ।
