दमक, १९ भदौ । भोटेकोशी नदीमा आएको बाढीबाट प्रभावित बनेकाहरूका लागि दमकस्थित आम्दा अस्पतालले आर्थिक सहयोग गर्नुका साथै प्रभावित क्षेत्रमा एक महिनासम्म स्वास्थ्य सेवा प्रदान गर्ने तयारी गरेको छ ।अस्पतालका मेडिकल सुपरिटेन्डेन्ट डा. शिखर कट्टेलका अनुसार बाढीबाट क्षति पुगेका क्षेत्रमा राहत, पुनःस्थापना तथा उद्धार कार्यमा सहयोग पुगोस् भन्ने उद्देश्यले अस्पतालका चिकित्सक, स्टाफ नर्स तथा अन्य कर्मचारीको एक–एक दिन बराबरको पारिश्रमिकसँगै अस्पतालको विपद् व्यवस्थापनसम्बन्धी छुट्याइएको कोषसमेत समावेश गरिएको छ ।
एक महिना स्वास्थ्य सेवा दिने तयारी
आम्दा अस्पतालले बाढी प्रभावित क्षेत्रमा पुगेर स्वास्थ्य सेवा प्रदान गर्न चिकित्सकीय टोलीसमेत तयारी अवस्थामा राखेको छ ।
डा. कट्टेलका अनुसार अस्पतालले सरकारलाई प्रभावित क्षेत्रमा स्वास्थ्य सेवा सञ्चालनका लागि स्थान तोकिदिन आग्रह गर्दै पत्राचार गरिसकेको छ । तर, सरकारले हालसम्म कुनै स्थान तोकिदिएको छैन । त्यसका कारण चिकित्सकीय टोली प्रभावित क्षेत्रमा पुग्न नसकेको उहाँले बताउनुभयो ।
“दमकबाट मेरो नेतृत्वमा पाँच जनाको टोली तयार छ । बुटवलबाट पनि अर्को चिकित्सकीय टोली तयार गरिएको छ भने आम्दा नेपालको केन्द्रीय कार्यालयले समेत थप टोली तयार गर्न सक्छ,” डा. कट्टेलले उज्यालो खबरलाई जानकारी दिदै भन्नुभयो “सरकारले प्रभावित क्षेत्रमा गएर स्वास्थ्य सेवा दिनु भनेर स्थान तोकिदिए मात्र पुग्छ । त्यसपछि आवश्यक विशेषज्ञसहितको टोली तत्काल पठाएर स्वास्थ्य सेवा दिन हामी तयार छौँ ।”अस्पतालले कम्तीमा एक महिनासम्म प्रभावित क्षेत्रमा चिकित्सकीय सेवा प्रदान गर्ने तयारी गरेको जनाएको छ ।
