दमक । भदौ २२ । दमकमा Gen-Z आन्दोलनको पहिलो वार्षिकोत्सवको अवसरमा भोलि स्मरण कार्यक्रम आयोजना हुने भएको छ।
आन्दोलनका क्रममा ज्यान गुमाएका तथा प्रभावित भएका Gen-Z पुस्ताका युवाहरूको सम्झनामा दमक चोकमा साँझ ५ बजेर ३० मिनेटमा क्यान्डल लाइटिङ तथा मौनधारण कार्यक्रम गर्न लागिएको हो।
आयोजकका अनुसार कार्यक्रम कुनै राजनीतिक दल वा व्यक्तिगत स्वार्थसँग सम्बन्धित नरहेको र आन्दोलनका क्रममा ज्यान गुमाएका तथा प्रभावित युवाहरूलाई सम्झनाका साथै आन्दोलनले ल्याएका परिवर्तनको स्मरण गर्ने उद्देश्यले कार्यक्रम आयोजना गर्न लागिएको हो।
आन्दोलनका क्रममा व्यक्त गरिएका प्रतिबद्धतामध्ये अझै पूरा हुन बाँकी विषयमा पनि सोच्ने साझा अवसरका रूपमा कार्यक्रमलाई लिइएको जेनजी अभियान्ता सुभम सिग्देलले जानकारी दिनुभयो ।
कार्यक्रममा सहभागी हुन सम्पूर्ण युवा तथा नागरिकलाई एउटा क्यान्डल लिएर दमक चोकमा उपस्थित हुन आह्वान गरिएको छ। कार्यक्रम शान्तिपूर्ण रूपमा सञ्चालन गरिने आयोजकले जनाएको छ।
आयोजकले कार्यक्रमलाई ‘झण्डाभन्दा माथि सम्झना, नाराभन्दा माथि एकता’ भन्ने भावनासहित आयोजना गर्न लागिएको जनाएको छ।
