दमक, २४ भदौ । इलाका प्रशासन कार्यालय दमकले बुधबार बिहान कार्यालय समय सुरु हुनासाथ एउटा सूचना जारी गर्यो। सूचनामा राहदानी तथा राष्ट्रिय परिचयपत्र बनाउन आउने सेवाग्राहीका लागि निःशुल्क फाराम भरिदिने व्यवस्था गरिएको उल्लेख छ।
सूचना जारी भएसँगै राहदानी र राष्ट्रिय परिचयपत्रको फाराम भर्न सेवाग्राहीले सय रुपैयाँ तिर्नुपर्ने बाध्यता अन्त्य भएको छ। इलाका प्रशासन कार्यालय दमकको छेउछाउमा फाराम भरिदिने भन्दै खुलेका सेवा केन्द्रबाट शुल्क तिरेर फाराम भर्नुपर्ने अवस्थासमेत अब अन्त्य भएको कार्यालयले जनाएको छ।
कार्यालयले जारी गरेको सूचनामा भनिएको छ, ‘अब उप्रान्त अनलाइन फाराम भर्नका लागि बाहिरका अनधिकृत व्यक्तिहरूलाई कुनै शुल्क बुझाउनु पर्ने छैन।’
इलाका प्रशासन कार्यालय दमकका प्रमुख विश्वराज नेपालले यो व्यवस्था बुधबारदेखि मात्रै सुरु गरिएको नभई कार्यालयले यसअघि पनि निःशुल्क फाराम भरिदिने काम गर्दै आएको बताउनुभयो। तर, सेवाग्राहीलाई सहज होस् भन्ने उद्देश्यले बुधबार सूचना जारी गरेर यसबारे औपचारिक जानकारी गराइएको उहाँको भनाइ छ।
उहाँले भन्नुभयो, हामीले गर्दै पनि आएका थियौँ। आज चाहिँ सूचना जारी पनि गरौँ न भन्ने भएर गरेका हौँ। हामीले दैनिक यो सेवाको सुविधा निःशुल्क गरिरहेका छौँ।’
अनलाइन फाराम भर्न सेवाग्राहीलाई कुनै अतिरिक्त खर्च नलाग्ने उहाँले स्पष्ट पार्नुभयो। फाराम भर्ने विषयमा समस्या भए कार्यालयमै आएर कर्मचारीको सहयोग लिन सकिने वा सेवाग्राही आफैँले पनि फाराम भरेर ल्याउन सक्ने कार्यालय प्रमुख नेपालको भनाइ छ।
यसमा केही खर्च लाग्ने होइन। अनलाइन फाराम भर्ने कुरा त्यहाँ भनेको अनुसार भर्ने हो। सेवाग्राही आफैँले पनि भरेर ल्याउन सक्नुहुन्छ। यो त्यस्तो गाह्रो काम होइन,’उहाँले भन्नुभयो।
