काठमाडौं , भदौ २६। नेपाली कांग्रेसकी सांसद रेनुका काउँचाले भोटेकोशी तथा त्रिशूली नदी आसपासका बाढी प्रभावित नागरिकको मानसिक स्वास्थ्य र मनोसामाजिक सुरक्षालाई प्राथमिकता दिन सरकारसँग माग गर्नुभएको छ ।शुक्रबार प्रतिनिधिसभाको बैठकमा बोल्दै सांसद काउँचाले भदौ १० गते भोटेकोशीमा आएको विनाशकारी बाढीले घर, सडक र सम्पत्तिमा क्षति पुर्याउनुका साथै प्रभावित नागरिकको मानसिक स्वास्थ्यमा समेत गम्भीर असर पारेको बताउनुभयो ।उहाले बाढी प्रभावित क्षेत्रमा बसोबास गर्ने नागरिकसँगै स्थानीय तहमा कार्यरत कर्मचारीको मानसिक अवस्था समेत गम्भीर बन्दै गएको दिनुभएको थियो
बताउनुभयो ।
काउँचाले अपर त्रिशूली–१ आयोजनामा कार्यरत रसुवाका इन्जिनियर सुरेश सापकोटा बेपत्ता भएको तथा शिक्षिका ईश्वरी भट्ट मानसिक रूपमा विक्षिप्त भएको घटनालाई उदाहरणका रूपमा प्रस्तुत गर्नुभयो ।बाढीका कारण धनजनको क्षति, घरबार गुमाउनु, आफन्त गुमाउनु, विस्थापन र भविष्यप्रतिको अनिश्चितताले धेरै पीडित तीव्र मानसिक तनाव, चिन्ता, एन्जाइटी, डिप्रेसनलगायत मनोसामाजिक समस्याबाट गुज्रिरहेको उहाले बताउनुभयो ।काउँचाले विपद्पछिको पुनस्र्थापना भौतिक संरचना निर्माणमा मात्र सीमित गर्न नहुने बताउनुभयो । ‘विपद्पछिको पुनस्र्थापना भनेको भत्किएका घर र सडक बनाउनु मात्र होइन, भत्किएको मन र आशालाई पनि पुनर्निर्माण गर्नु हो,’ उहाले भन्नुभयो ।
उहाले बाढी प्रभावित क्षेत्रमा उद्धार र राहतसँगै मानसिक स्वास्थ्य तथा मनोसामाजिक सुरक्षाका कार्यक्रम सञ्चालन गर्न सरकारसँग आग्रह गर्नुभयो । विशेषगरी बालबालिका, महिला, ज्येष्ठ नागरिक तथा आफन्त गुमाएका परिवारलाई लक्षित गरी तत्काल मनोसामाजिक सहयोगका कार्यक्रम सञ्चालन गर्नुपर्ने उहाको भनाइ छ ।त्यस्तै, पीडित नागरिकमा रहेको भविष्यप्रतिको अनिश्चितता हटाउन पुनस्र्थापना तथा जीविकोपार्जनको स्पष्ट योजना ल्याउन उनले सरकारको ध्यानाकर्षण गराउनुभयो । स्थानीय आवश्यकता र संस्कृतिअनुसार योग, ध्यान तथा सामुदायिक सहयोगका कार्यक्रम सञ्चालन गर्नुपर्ने पनि उहाले बताउनुभयो ।‘बाढीले मानिसको घर बगाएको छ, तर सरकारले उनीहरूको आशा बग्न दिनुहुँदैन,’ काउँचाले बताउनुभयो ।भौतिक राहतसँगै मानसिक स्वास्थ्यलाई पनि समान प्राथमिकता दिँदै सरकारले प्रभावित नागरिकलाई सुरक्षित भविष्य र बाँच्ने आत्मविश्वास दिलाउनुपर्ने उहाले बताउनुभयो ।
