दमक, २६ भदौ ।
दमक नगरपालिका–७ मा ६२औँ राष्ट्रिय बाल दिवसको अवसरमा आयोजित अन्तरविद्यालयस्तरीय निबन्ध तथा चित्रकला प्रतियोगिता सम्पन्न भएको छ।
वडा नम्बर ७ बाल सञ्जालको आयोजनामा भएको प्रतियोगितामा वडाभित्रका चार विद्यालयका विद्यार्थी सहभागी भएका थिए। प्रतियोगितामा इस्टर्न स्टार बोर्डिङ स्कुल, सिद्धार्थ बोर्डिङ स्कुल, हलेसी लिटल एन्जल्स र श्री पृथ्वी माध्यमिक विद्यालयका विद्यार्थी सहभागी भएका हुन्।
निबन्ध प्रतियोगितामा सिद्धार्थ बोर्डिङ स्कुलका निर्भय श्रेष्ठ प्रथम, इस्टर्न स्टार बोर्डिङ स्कुलकी हाङ्सामा राई द्वितीय र सोही विद्यालयकी नन्दनी शाह तृतीय भएका छन्। निबन्ध प्रतियोगितामा हरेक विद्यालयबाट दुई जना बालक र दुई जना बालिका गरी सहभागी गराउने व्यवस्था गरिएको थियो। हलेसी लिटल एन्जल्सका विद्यार्थी भने निबन्ध प्रतियोगितामा सहभागी नभएको आयोजकले जनाएको छ।
यस्तै, चित्रकला प्रतियोगितामा इस्टर्न स्टार बोर्डिङ स्कुलकी निवा इङ्नाम लिम्बू प्रथम, सोही विद्यालयका निकेश श्रेष्ठ द्वितीय र श्री पृथ्वी माध्यमिक विद्यालयकी पूर्णिमा राई तृतीय भएकी छन्।
चित्रकला प्रतियोगितामा विद्यालयबाट एक जना बालक र एक जना बालिका गरी कुल आठ जना विद्यार्थी सहभागी भएका थिए।
प्रतियोगिताका विजेतालाई ट्रफी, पदक र प्रमाणपत्र प्रदान गरिएको छ। प्रतियोगिता वडा नम्बर ७ बाल सञ्जालका अध्यक्ष कमल पोखरेलको अध्यक्षतामा सम्पन्न भएको थियो। कार्यक्रममा वडा नम्बर ७ का वडाध्यक्ष भीमप्रसाद पौडेल प्रमुख अतिथि रहनुभएको थियो भने कार्यक्रमको सञ्चालन बाल सञ्जालका सचिव अभिषेक ढकालले गर्नुभएको थियो।
वडा नम्बर ७ का सचिव योगेश भट्टराईका अनुसार बालबालिकाको सिर्जनात्मक क्षमता तथा प्रतिभा प्रस्फुटन गराउने उद्देश्यले प्रतियोगिता आयोजना गरिएको हो।
