चीनको राज्य सुरक्षा मन्त्रालयले तीव्र गतिमा विकसित भइरहेको आर्टिफिसियल इन्टेलिजेन्स ९एआई० प्रविधिको दुरुपयोगबाट देशको राजनीतिक, सामाजिक तथा साइबर सुरक्षामा गम्भीर खतरा उत्पन्न हुन सक्ने चेतावनी दिएको छ।
मन्त्रालयका अनुसार डीपफेक अडियो–भिडियो, एआईबाट तयार गरिएका झुटा सामग्री र ‘इन्टेलिजेन्ट ट्रोल आर्मी’मार्फत राजनीतिक अफवाह फैलाउने, गलत सूचना प्रसार गर्ने तथा सामाजिक विभाजन बढाउने काम कम खर्चमै ठूलो स्तरमा गर्न सकिन्छ।
राज्य सुरक्षा मन्त्री चेन यीशिनले यस्तो गतिविधिले चीनविरुद्ध ‘कग्निटिभ वारफेयर’ अर्थात् जनताको धारणा र सोच प्रभावित गर्ने युद्ध सञ्चालन हुन सक्ने बताएका छन्। यसले राजनीतिक, संस्थागत र वैचारिक सुरक्षामा प्रत्यक्ष असर पार्न सक्ने उनको भनाइ छ।
चीनले एआईलाई केवल प्रविधिको विषय नभई राष्ट्रिय सुरक्षासँग जोडिएको संवेदनशील विषयका रूपमा हेर्न थालेको पछिल्लो वक्तव्यले देखाएको छ।
विदेशी एआई उपकरण प्रयोग गर्दा संवेदनशील सरकारी तथा संस्थागत सूचना बाहिरिन सक्ने जोखिमप्रति पनि चीनले चिन्ता व्यक्त गरेको छ। विशेषगरी साइबर सुरक्षा, वित्तीय, स्वास्थ्य तथा संवेदनशील सरकारी क्षेत्रमा विदेशी एआई प्रविधिको प्रयोगमा थप कडाइ हुन सक्ने संकेत देखिएको छ।
यसैबीच, अमेरिकी प्रविधि क्षेत्रका केही नेतृत्वकर्ताले पनि एआईको तीव्र विकासले भविष्यमा गम्भीर जोखिम निम्त्याउन सक्ने चेतावनी दिँदै आएका छन्। चीन भने एआई विकासको गति रोक्नेभन्दा सुरक्षा, नियमन र अन्तर्राष्ट्रिय सहकार्यलाई प्राथमिकता दिनुपर्ने पक्षमा देखिएको छ।
