काठमाडौँ,२९ भदौ। नेकपा एमाले निर्वाचन समीक्षा तथा पार्टी पुनर्गठन कार्यदलको बैठकले दुवै प्रतिवेदन एउटा बनाएर ल्याउन उपाध्यक्ष रामबहादुर थापा ‘बादल’, उपाध्यक्ष विष्णु पौडेल र महासचिव शंकर पोखरेललाई जिम्मा दिएको छ ।काभ्रेको बल्थलीमा दुई दिन सञ्चालन भएको कार्यदल बैठकमा सहमति नजुटेपछि तीन नेतालाई जिम्मेवारी दिइएको हो। थापा कार्यदलका संयोजक हुनुन्छ भने पोखरेल सदस्यसचिव हुनुन्छ ।तर कार्यदल सदस्य तथा एमाले सचिव महेश बस्नेतले बैठकले पार्टी अध्यक्ष परिवर्तन गर्ने विषयमा फिजाइएको भ्रम र हल्ला चिरिएको दाबी गर्नु भएको छ ।
‘कार्यदलमा प्रस्तुत दुवै मस्यौदा प्रस्ताव तथा बैठकका क्रममा सदस्यहरूले राखेका सुझावहरूलाई समेटी अन्तिम रूप दिने जिम्मेवारी संयोजक रामबहादुर थापा ‘बादल’, उपाध्यक्ष विष्णु पौडेल र सदस्य सचिव शंकर पोखरेललाई दिइएको छ’, बस्नेतले जानकारी दिनु भएको छ । साथै बैठकले पार्टीको समग्र कार्यशैली, सङ्गठनात्मक अवस्था तथा संरचनामा आवश्यक पुनर्संरचना र पुनर्ताजगी ल्याउने विषयमा गम्भीर छलफल भएको जनाएका छन् । साथै बैठकले वर्तमान सरकारका अधिनायकवादी गतिविधिको एकताबद्ध भएर जनताको पक्षमा उभिने निर्णय गरेको छ ।
‘वर्तमान सरकारका अधिनायकवादी, फासिवादी तथा जनविरोधी गतिविधिको विरोध गर्दै जनताको पक्षमा दृढ, एकताबद्ध र जुझारु सङ्गठन निर्माण गर्ने विषयमा प्राप्त सुझावहरूलाई समेत छलफलमा समेटियो’,सचिव बस्नेतले भन्नु भएको छ।कार्यदलको अर्को बैठक आगामी असोज १ गते बस्ने सदस्यहरूले बताएका छन्। सोही बैठकमा तीन नेताले एकीकृत प्रतिवेदन पेस गर्नेछन् ।
