धनुषा,३० भदौ। धनुषामा अपहरणमा परेका १५ महिनाका बालक सिद्वान्त महतोलाई प्रहरीले सकुशल उद्धार गरेको छ। बालक अपहरणमा संलग्न रहेको आरोपमा एक महिलालाई समेत प्रहरीले पक्राउ गरेको छ।
विदेह नगरपालिका–६, तीनकोरियास्थित घरको आँगनमा खेलिरहेका बालक सिद्वान्त गत भदौ १८ गते दिउँसो करिब ४ः४० बजे हराएका थिए। बालक हराएको सूचना पाएलगत्तै जिल्ला प्रहरी कार्यालय धनुषाले प्रहरी निरीक्षक रुपेश खड्काको कमाण्डमा ६० जनाको टोली तथा तालिमप्राप्त कुकुर परिचालन गरी खोजी सुरु गरेको थियो।
अनुसन्धानका क्रममा प्रादेशिक सूचना विश्लेषण तथा अनुसन्धान समूह-PIIT समेत परिचालन गरिएको थियो। अनुसन्धानबाट कमला नगरपालिका–९, हथलेट्वाकी ४१ वर्षीया पुनिता देवी पासवानले बालकलाई अपहरण गरी नेपाल तथा भारतका विभिन्न स्थानमा लैजाँदै लुकाएको खुलेको प्रहरीले जनाएको छ।
प्रहरीले घेराबन्दी गरेपछि भदौ २९ गते बेलुकी ३ः३५ बजे बालकलाई घरदेखि करिब ३०० मिटर दक्षिण सडकछेउमा छाडेर आरोपी भागेकी थिइन्। प्रहरीले तत्काल बालकलाई सकुशल उद्धार गरेको हो। स्वास्थ्य परीक्षणपछि बालकको अवस्था सामान्य रहेको र अभिभावकको जिम्मा लगाइएको प्रहरीले जनाएको छ।
बालकलाई छाडेर भागेकी पासवानलाई पनि सोही दिन बेलुकी ३ः४५ बजे विदेह नगरपालिका–१, महिनाथपुरस्थित दशगजा क्षेत्रबाट प्रहरीले नियन्त्रणमा लिएको छ।
प्रहरीका अनुसार पक्राउ परेकी पासवानमाथि अपहरण, शरीर बन्धक तथा मानव बेचबिखन तथा ओसारपसारसम्बन्धी कसुरमा थप अनुसन्धान भइरहेको छ।
