काठमाडौं,३० भदौ । नेकपा (एमाले)का सांसद ऐनबहादुर महरले प्रतिनिधिसभाको गरिमा र मर्यादा कायम राख्ने जिम्मेवारी सरकारको बढी हुने बताउनु भएको छ।
मंगलबार बसेको प्रतिनिधिसभाको बैठकमा बोल्दै उहाँले सत्तापक्षबाटै पटक–पटक सदनको गरिमा र मर्यादामा आँच आउने व्यवहार भइरहेको आरोप लगाउनु भएको हो ।
उहाँले भन्नुभयो, ‘प्रतिनिधिसभाको गरिमा र मर्यादा कायम गर्नु हामी सबै माननीय सदस्यहरूको दायित्व हो र यसमा सबैभन्दा बढी जिम्मेवारी सरकारको हुन आउँछ । हामीले धेरै पटक आग्रह गरिसकेका छौँ । यो विषय उठान गरिसकेका छौँ । सरकार पक्षबाट, सत्तापक्षबाट पटक–पटक यो सदनको गरिमा आँच आउने गरी, मर्यादामा आँच आउने गरी व्यवहार भइरहेका छन् र त्यो प्रकारको कार्यशैली र व्यवहार यहाँ प्रकट भइरहेको छ ।’
महरले सदनको गरिमा र मर्यादा प्रतिपक्षबाट मात्रै अपेक्षा गरिएको हो कि सरकारबाट पनि हो भन्दै प्रश्न गर्नुभयो ।
उहाँले भन्नुभयो, ‘म प्रश्न सोध्न चाहन्छु, के यो सभाको गरिमा र मर्यादा प्रतिपक्षहरूबाट मात्रै अपेक्षा गरिएको हो रु? म यो प्रश्न गर्न चाहन्छु । सबैभन्दा बढी सरकारले यो सभाको गरिमा र मर्यादा राख्नुपर्ने हैन र?’
महरले प्रतिनिधिसभा नियमावलीको नियम २० को उपनियम ६ ले सभामुखको आसन तथा बोलिरहेको सदस्यको बीचबाट हिँड्न नहुने व्यवस्था गरेको भन्दै प्रधानमन्त्री र गृहमन्त्रीले समेत उक्त नियम उल्लङ्घन गरेको आरोप लगाउनु भयो ।
उहाँले भन्नुभयो, ‘भर्खरै माननीय युवराज दुलाल बोलिरहेको बखत माननीय गृहमन्त्रीज्यू प्रतिनिधिसभा नियमावलीको नियम २० को ६ ले सभामुखको आसन तथा बोलिरहेको सदस्यको बीचबाट हिँड्न नहुने भन्ने नियमको व्यवस्था गरेको छ । यो नियमको उल्लङ्घन गर्दै कहिले प्रधानमन्त्रीज्यू, कहिले माननीय गृहमन्त्रीज्यूहरूले त्यो नियमको उल्लङ्घन गर्नुभएको छ र म आग्रह गर्न चाहन्छु।’
