रसुवा ३१ भदौ। भोटेकोशी बाढीबाट रसुवामा भएको मानवीय तथा भौतिक क्षतिको विवरण सङ्कलन गर्न २५ सदस्यीय तथ्याङ्क मूल्याङ्कन समिति गठन गरिएको छ। समितिलाई एक महिनाभित्र प्रारम्भिक क्षतिको विवरण सङ्कलन गर्ने जिम्मेवारी दिइएको छ।
जिल्ला विपद् व्यवस्थापन समितिका संयोजक एवं प्रमुख जिल्ला अधिकारी कमलप्रसाद पाण्डेको अध्यक्षतामा मंगलबार बसेको बैठकले जिल्ला समन्वय अधिकारी राजेन्द्रप्रसाद आचार्यको संयोजकत्वमा समिति गठन गरेको हो। समितिको सदस्यसचिवमा सहायक प्रमुख जिल्ला अधिकारी द्रुवप्रसाद अधिकारी छन्।
समितिमा सडक सुधार आयोजना, सहरी विकास तथा भवन निर्माण आयोजना, रसुवा भन्सार कार्यालय, सुरक्षा निकाय, नापी, भूमि प्रशासन, जलविद्युत् आयोजना, नेपाल इन्टरमोडललगायत २५ सरकारी तथा गैरसरकारी निकायका प्रमुख वा प्रतिनिधि सदस्य छन्।
सङ्कलित तथ्याङ्कका आधारमा राहत, पुनःस्थापना तथा पुनर्निर्माणका थप प्रक्रिया अघि बढाइने जनाइएको छ।
स्थानीय तहका भवन पुनःस्थापनाको तयारी
बाढीले स्याफ्रुबेँसीस्थित गोसाइँकुण्ड गाउँपालिकाको भवन बगाएपछि नियमित सेवा सञ्चालनका लागि रसुवा भूसंरक्षण कार्यालयको खाली भवन प्रयोग गर्ने निर्णय गरिएको छ।
त्यस्तै, बेत्रावतीको खाल्टेमा बाढीले उत्तरगया गाउँपालिकाको भवन बगाएपछि नयाँ भवन निर्माणका लागि बेत्रावतीमाथिको सामुदायिक वन क्षेत्रमा आवश्यक प्रक्रिया अघि बढाउने निर्णय भएको जिल्ला प्रशासन कार्यालयले जनाएको छ।
बाढी प्रभावित क्षेत्रमा उद्धार तथा विपद्सम्बन्धी कामका लागि निजी कम्पनीका हेलिकप्टर आवश्यक परे सम्बन्धित संघसंस्था वा व्यक्तिको लिखित अनुरोधका आधारमा रसुवा उडानको अनुमति लिन सहजीकरण गरिने प्रशासनले जनाएको छ।
बेलीब्रिज जडान गर्न नागरिक समाजको माग
यसैबीच, रसुवा नागरिक समाजले बाढीले क्षति पुर्याएका रसुवा–नुवाकोट सीमास्थित बेत्रावतीको फलाखुखोला, स्याफ्रुबेँसीको भोटेकोशी तथा रोङ्गा खोलामा यथाशीघ्र बेलीब्रिज जडान गर्न माग गरेको छ।
सडक तथा पैदलमार्गको सञ्जाल पुनः जोड्न ती स्थानमा बेलीब्रिज निर्माणको काम तीव्र बनाउन नागरिक समाजले आग्रह गरेको हो।
