झापा,२ असोज। मेची राजमार्ग पटक–पटक अवरुद्ध भइरहेका बेला वैकल्पिक मार्गका रूपमा हेरिएको केचना–कञ्चनजंघा (मेची करिडोर) सडक निर्माणमा चरम ढिलाइ भएको छ। इलाम, पाँचथर र ताप्लेजुङका नागरिकका लागि महत्वपूर्ण मानिएको यो सडक वर्षौँदेखि निर्माणाधीन छ।
झापाको बिर्तामोड पुग्न मेची राजमार्गबाट करिब ८६ किलोमिटर दूरी पार गर्नुपर्ने भए पनि केचना–कञ्चनजंघा सडक बनेपछि यो दूरी करिब ४८ किलोमिटरमा झर्ने अपेक्षा गरिएको छ।
गोलाखर्क भञ्ज्याङ–बेलासे खण्डको करिब ९.५ किलोमिटर सडक निर्माणका लागि खड्का–कृष्ण–सक्षम जेभीले २०७८ असार २९ गते २ वर्षमा काम सक्ने गरी २७ करोड २१ लाख ५३ हजार रुपैयाँमा ठेक्का लिएको थियो। २०८० पुस २९ सम्म काम सक्नुपर्नेमा पटक–पटक म्याद थपिँदै अहिले २०८३ असोजसम्म पुर्याइएको छ।
तर पाँच वर्ष बित्न लाग्दा पनि सडकको भौतिक प्रगति जम्मा ४६ प्रतिशत छ। अझ गम्भीर कुरा, अहिलेसम्म एक फिट पनि कालोपत्रे भएको छैन। सडक डिभिजनका अनुसार केही किलोमिटर क्षेत्रमा सब–बेससम्मको काम भए पनि वर्षातमा त्योसमेत क्षतिग्रस्त भएको छ।
मेची राजमार्गको राजदुवाली क्षेत्रमा पहिरो खस्दा सडक अवरुद्ध भएपछि वैकल्पिक मार्गको आवश्यकता झन् स्पष्ट भएको छ। तर विकल्पका रूपमा निर्माण भइरहेको सडक नै अधुरो हुँदा यात्रु, व्यापारी, विद्यार्थी र बिरामी बोकेका एम्बुलेन्ससम्म प्रभावित भइरहेका छन्।
यसअघि निर्माणको गति सन्तोषजनक नभएको भन्दै ठेक्का तोड्न निर्देशनसमेत दिइएको थियो। तर निर्माण कम्पनीलाई अन्तिम मौका दिने भन्दै प्रक्रिया रोकियो। त्यसपछि पनि कामले अपेक्षित गति लिन नसकेको स्थानीयको गुनासो छ।
