चितवन , असोज ३। चितवन राष्ट्रिय निकुञ्जको जंगलमा भेटिने चर्चित जंगली भाले हात्ती रोनाल्डो करेन्ट लागेर मरेको पुष्टि भएको छ । आज बिहान बिसहजारी ताल नजिकै रहेको कुमाल तालको छेउमा मृत अवस्थामा भेटिएको रोनाल्डोलाई करेन्ट लागेको हो ।निकुञ्ज सुरक्षार्थ खटिएको नेपाली सेनाको ब्यारेकमा लगेको विद्युत्को तारबाट करेन्ट लाग्दा रोनाल्डोको घटनास्थलमा नै मृत्यु भएको थियो । सेनाले बिसहजारी तालको गेटतिरबाट विद्युत् लगेको थियो ।स्रोतका अनुसार, झण्डै १५१६ फिट अग्लो ठाँउमा रहेको तारसँगै रहेको घाँसलाई खानका लागि रोनाल्डोले तान्दा घाँससँगै तारसमेत झरेको थियो । बाहिर इन्सुलेसन गरेको तार रोनाल्डोले चपाउँदा त्यसमा प्रवाह भएको करेन्ट उसको मुख तथा जिब्रोमा लागेको थियो ।
रोनाल्डोको मुखको भाग तथा जिब्रोको केही भाग डढेको जस्तो अवस्थामा रहेको छ । यसबारेमा निकुञ्जले कुनै आधिकारिक जानकारी दिएको छैन । रोनाल्डोको मृत शरिरलाई पोष्टमार्टम पछि खाल्डो खनेर गाड्ने काम हुँदैछ ।५३ वर्षीय रोनाल्डो सौराहाको हात्ती प्रजनन् केन्द्रमा रहेका पोथी हात्तीसँग प्रजनन् गर्ने एक नम्बरको हात्ती रहेको थियो । रोनाल्डो हात्ती २४ वर्ष अगाडि निकुञ्जमा देखिएको थियो ।रोनाल्डो ३८ वटा छावाको बाबू भएको निकुञ्जले जनाएको छ । दुई बर्ष अगाडि सौराहा क्षेत्रमा देखिएको भाले मकुना हात्तीलाई निकुञ्ज भित्र पठाउने क्रममा सेनाले गोली हानेर मारेको थियो । निकुञ्जमा रहेका पोथी हात्तीलाई प्रजनन् गर्न अब गोविन्दे र धु्रबे हात्ती मात्रै बाँकी छन् । रोनाल्डो हात्ती भइन्जेल ध्रुवे र गोविन्दे हात्ती प्रजनन् केन्द्रतिर देखिँदैनथे ।
