दमक, ५ असोज । नेपाली कांग्रेस दमक–६ को वडा सभापतिमा गोपाल गुरागाईं निर्विरोध निर्वाचित हुनुभएको छ। दमक उद्योग वाणिज्य संघका अध्यक्षसमेत रहनुभएका गुरागाईं केही वर्षअघि नेकपा एमाले परित्याग गरी कांग्रेस प्रवेश गर्नुभएको थियो।
आज वडामा भएको पार्टीको छलफलपछि निर्वाचन समितिले उहाँको एकल नाममा सहमति जनाउँदै वडा सभापतिमा सर्वसम्मत निर्वाचित गरेको हो।
यस्तै, उपसभापतिमा धनपति तिमिल्सिना र महिला उपसभापतिमा फर्निचर व्यवसायी रेणुका ओली चयन हुनुभएको छ। सचिवमा औषधिको थोक विक्रेता विवेक बजगाईं र सह–सचिवमा इलेक्ट्रोनिक सामानका होलसेल व्यवसायी दयासागर आचार्य चयन हुनुभएको छ।
कोषाध्यक्ष पदमा भने यी पदाधिकारीले मनोनित गर्ने प्रावधान रहेकाले सबै सदस्यको टुंगो लागेपछि चयन गरिने नवनिर्वाचित वडा सभापति गुरागाईंले जानकारी दिनुभएको छ।
वडा सभापतिमा निर्वाचित भएपछि प्रतिक्रिया दिँदै गुरागाईंले आगामी स्थानीय तहको निर्वाचनमा वडा अध्यक्ष बन्ने बाटो खुलेको बताउनुभयो। उहाँले वडा अध्यक्ष बनेर वडाको विकास र समृद्धिका लागि योजनाबद्ध रूपमा काम गर्ने बताउँदै त्यसका लागि विभिन्न योजना निर्माणको कामसमेत सुरु गरिसकेको जानकारी दिनुभयो।
यद्यपि, कांग्रेसको विधानमा वडा अध्यक्षको उम्मेदवार बन्न वडा सभापति नै हुनुपर्ने अनिवार्य व्यवस्था छैन। पार्टीले वडा सभापतिलाई नै वडा अध्यक्षका रूपमा अघि बढाउन सक्ने भएकाले गुरागाईंको निर्विरोध चयनलाई आगामी स्थानीय निर्वाचनसँग जोडेर हेरिएको छ।
