काठमाडौं,४ असोज । नेपालमा आगामी असोज ८ गते बिहीबारदेखि १२ गतेसम्म वर्षाको गतिविधि बढ्न सक्ने मौसमविद्हरूले बताएका छन्।
बंगालको खाडीमा विकसित भइरहेको न्यूनचापीय प्रणाली र पश्चिमी वायुमण्डलीय प्रणालीको प्रभावका कारण देशका विभिन्न क्षेत्रमा भारीदेखि अति भारी वर्षा हुनसक्ने सम्भावना रहेको बताइएको छ।
तर यही विषयलाई लिएर सामाजिक सञ्जालमा ‘असोज ८ देखि १२ गतेसम्म देशभर लगातार भीषण वर्षा हुन्छ’, ‘असोज १० गते ठूलो विपत्ति आउँछ’ लगायतका दाबीसमेत फैलिरहेका छन्।
यी दाबीलाई अहिले नै निश्चित सत्य मान्नु हुँदैन।
केही मौसम पूर्वानुमान मोडलले धेरै वर्षाको सम्भावना देखाएका छन्। तर कुन ठाउँमा कति वर्षा हुन्छ, कुन दिन बढी प्रभाव पर्छ र मौसमी प्रणाली कति शक्तिशाली हुन्छ भन्ने कुरा अहिले नै पूर्ण रूपमा निश्चित भइसकेको छैन। मौसम प्रणालीको दिशा र शक्ति परिवर्तन हुन सक्ने भएकाले आगामी दिनको पूर्वानुमानसँगै अवस्था थप स्पष्ट हुने मौसमविद्हरूले बताएका छन्।
भ्रम के हो ?
सामाजिक सञ्जालमा फैलिएको ‘असोज १० गते नै अत्यधिक वर्षा निश्चित हुन्छ’ भन्ने दाबीलाई अहिलेसम्म आधिकारिक रूपमा पुष्टि गरिएको छैन। त्यस्तै, बंगालको खाडीमा बनेको प्रणालीलाई अहिले नै निश्चित रूपमा ठूलो चक्रवात आउने वा त्यसको नामसमेत तोकिसकिएको घटनाका रूपमा प्रस्तुत गर्नु पनि उचित हुँदैन।अर्थात्, जोखिमको सम्भावना छ, तर विपत्ति निश्चित भइसकेको छैन।
तर सावधानी किन आवश्यक ?
सम्भावित भारी वर्षाका कारण नदी तथा खोलामा पानीको बहाव बढ्न, तल्लो भूभागमा डुबान हुन, पहाडी क्षेत्रमा पहिरो जान तथा सडक अवरुद्ध हुन सक्ने जोखिम हुन्छ।
विशेषगरी पहिले नै बाढी–पहिरो प्रभावित क्षेत्र, नदी किनार, भिरालो बस्ती र कमजोर सडकहरूमा बसोबास गर्ने तथा यात्रा गर्नेहरूले थप सावधानी अपनाउन आवश्यक छ।
सर्वसाधारणलाई आग्रह
सामाजिक सञ्जालको अपुष्ट सूचना हेरेर नआत्तिनुहोस्।
मौसम तथा बाढीसम्बन्धी आधिकारिक सूचना मात्र विश्वास गर्नुहोस्।
भारी वर्षा भइरहेका बेला अनावश्यक यात्रा नगर्नुहोस्।
नदी, खोला, खोल्सा र पहिरोको जोखिम भएका क्षेत्रमा नजानुहोस्।
घर वरिपरिको पानी निकास खुला राख्नुहोस्।
जोखिमयुक्त बस्तीमा बस्नेले आवश्यक सामग्रीसहित पूर्वतयारीमा रहनुहोस्।
बालबालिका तथा ज्येष्ठ नागरिकलाई विशेष ध्यान दिनुहोस्।
जल तथा मौसम विज्ञान विभागले मौसम तथा बाढीसम्बन्धी सूचना निरन्तर अद्यावधिक गरिरहेको छ। विभागको टोल फ्री नम्बर ११५५ मा मौसम तथा बाढीसम्बन्धी जानकारी लिन सकिन्छ।
