काठमाडौं ,७ असोज। नेपाली कम्युनिष्ट पार्टीका सांसद युवराज दुलालले रसुवा भोटेकोशी–त्रिशूली बाढीमा बेपत्ता नागरिकलाई मृतकसरह कानुनी हैसियत दिन सरकारसँग माग गर्नुभयो।
बुधबार बसेको प्रतिनिधिसभाको बैठकमा बोल्दै सांसद दुलालले बाढीमा बेपत्ता नागरिकले प्राप्त गर्नुपर्ने रकमदेखि आर्थिक कारोबारसम्म सबै रोक्का रहेको बताउनु भयो।
उहाँले बेपत्ता नागरिकका परिवारले पटक–पटक उनीहरूलाई मृतकसरह कानुनी हैसियत प्रदान गर्न माग गर्दै आएको भन्दै सरकारको ध्यानाकर्षण गराउनु भयो।
उहाँले भन्नु भयो, ‘रसुवा भोटेकोशी–त्रिशूली बाढीमा बेपत्ता नागरिकहरूले प्राप्त गर्नुपर्ने रकमदेखि आर्थिक कारोबारसम्म सबै रोक्का छ। त्यसैले बेपत्ता नागरिकहरूलाई मृतकसरह कानुनी हैसियत प्राप्त होस् भन्ने पीडितहरूको पटक–पटकको माग छ। त्यस विषयमा सरकारको ध्यानाकर्षण गराउन चाहन्छु।’
