काठमाडौ | ७ असोज | भारी वर्षा, उच्च पहाडी तथा हिमाली क्षेत्रमा हिमपात, हावाहुरी र चट्याङको सम्भावना रहेकाले शिक्षा, विज्ञान तथा प्रविधि मन्त्रालयले विद्यालय बन्द गर्न आग्रह गरेको छ।
जल तथा मौसम विज्ञान विभाग, राष्ट्रिय विपद् जोखिम न्यूनीकरण तथा व्यवस्थापन प्राधिकरण तथा सम्बन्धित क्षेत्रका विज्ञहरूको पूर्वानुमानका आधारमा मन्त्रालयले यस्तो आग्रह गरेको हो।
मन्त्रालयका अनुसार वर्षाका कारण बाढी, पहिरो, डुबान, नदी कटान, हिमपहिरो, सडक अवरोध तथा विद्युत् र सञ्चार सेवामा अवरोध हुनसक्ने जोखिम छ।
मन्त्रालयले देशभरका शिक्षण संस्था, स्थानीय तह, शिक्षक, विद्यार्थी, अभिभावक तथा सरोकारवालालाई आवश्यक सावधानी अपनाउन अनुरोध गरेको छ।
मन्त्रालयले स्थानीय तहसँगको समन्वयमा असोज ८ र ९ गते विद्यालय बिदा गर्न आग्रह गरेको छ।
यस्तै, विश्वविद्यालय तथा परीक्षा सञ्चालन गर्ने निकायले असोज ९ देखि ११ गतेसम्म तोकिएका परीक्षा आवश्यकताअनुसार स्थगित गर्न भनेको छ।
विपद्का कारण विद्यालय भवनलाई अस्थायी आश्रयस्थलका रूपमा प्रयोग गर्नुपर्ने अवस्था आएमा स्थानीय तहलाई सहजीकरण गर्न पनि मन्त्रालयले आग्रह गरेको छ।
त्यसैगरी, अभिभावकलाई बालबालिकालाई नदी, खोला, पोखरी तथा पहिरोको जोखिम भएका स्थानमा नजान दिन मन्त्रालयले अनुरोध गरेको छ।
मन्त्रालयका प्रवक्ता एवं सहसचिव श्रीप्रसाद भट्टराईद्वारा जारी सार्वजनिक सूचनामा मौसमजन्य जोखिमलाई मध्यनजर गर्दै सावधानी अपनाउन आग्रह गरिएको हो।
